මුතුරාජවෙල තෙත් බිමෙහි අක්කර 100කට වැඩි ප්‍රමාණයක් ගොඩකර එහි ද්‍රවීකෘත ස්වභාවික වායු (එල්.එන්.ජී) බලාගාරයක් ඉදිකිරීමට රජය සැලසුම් කර ඇති බවත්, එවැනි පරිසර විනාශයකට කිසිවිටෙකත් ඉඩනොදෙන බවත් මැල්කම් කාදිනල් රංජිත් කොළඹ අගරදගුරුතුමෝ පැවසූහ.
පරිසරයට හානි කරමින් සිදුකරන ව්‍යාපෘති සංවර්ධන ව්‍යාපෘති නොව විනාශකාරී ව්‍යාපෘති බව කී කාදිනල්තුමෝ මුතුරාජාවෙලට අත නොතබන්නැයි තමන් යළිත් රජයට දැනුම්දෙන බව ද සඳහන් කළහ.
මෙම ව්‍යාපෘතිය සම්බන්ධයෙන් සකස් කර ඇති පාරිසරික බලපෑම් තක්සේරු වාර්තාව දෙස බැලීමේදී එහි මූලික නීතිමය දුර්වලතා රැසක් ද ඇතැයි කී අගරදගුරුතුමෝ තමන් ඊට විරෝධය පා මධ්‍යම පරිසර අධිකාරියට ලිපියක් යොමු කළ බව ද පැවසූහ.
කොළඹ වරාය නගරය, බහුකාර්ය ප්‍රවාහන මධ්‍යසස්ථානය, සමුද්‍ර නගර ව්‍යාපෘතිය ආදිය වෙනුවෙන් විදුලිය ලබාගැනීමට මෙම ව්‍යාපෘතිය ක්‍රියාත්මක කිරීමට යන බව ද කාදිනල්තුමෝ කීහ.
මැල්කම් කාදිනල් රංජිත් කොළඹ අගරදගුරුතුමෝ මේ බව පැවසුවේ බොරැල්ල, අගරදගුරු නිල නිවසේදී පැවති මාධ්‍ය හමුවක් අමතමිනි.
මුතුරාජවෙල තෙත් බිමෙහි අක්කර 100ක් මුහුදු වැලිවලින් ගොඩ කර සිදුකරන්නට යන මෙම විනාශය තුළින් සාගර පරිසර කලාපයට මෙන්ම මුතුරාජවෙල අවට ප්‍රදේශයට ද දැඩි ගංවතුර තර්ජන ද ඇතිවනු ඇතැයි කී කාදිනල්තුමෝ අවට ජනතාවට ඉදිරියේදී නිවෙස්වල බෝට්ටුවක් තබාගැනීමට සිදුවනු ඇතැයි ද කීහ.
මේ සම්බන්ධයෙන් සකස් කර ඇති පරිසර ඇගයීම් වාර්තාව සම්බන්ධව් මහජන අදහස් දැක්වීම සඳහා දින 30ක් ලබාදී ඇත්තේ රට තුළ සංචරණ සීමා පැවති කාලයේදී බව කී කාදිනල්තුමෝ මෙය හොර රහසේම සම්මත කරගැනීමේ කූඨ උත්සාහයක් පැවති බව පෙනෙන්නේ යැයි ද ප්‍රකාශ කළහ.
මුතුරාජවෙල පරිසර කලාපය විනාශ කිරීම ආරම්භ වූයේ රණසිංහ ප්‍රේමදාස ජනාධිපතිවරයාගේ පාලන සමයේ අක්කර 400ක් ගොඩකිරීමෙන් බව කී කාදිනල්තුමෝ ඉන්පසු පැමිණි විවිධ රජයන් එහි ගොඩකිරීම් සිදුකරමින් හානි කළ බවත්, මේ වන විට කැලිකසල බැහැර කිරීම ආදී විනාශයන් රැසක් එහි සිදුවන බවත් පෙන්වා දුන්හ.