කොළඹ කොටස් වෙළෙඳපොළ ඉතිහාසයේ ඉහළම අගය වාර්තා කරයි

කොළඹ කොටස් වෙළෙඳපොළ ඉතිහාසයේ “සියලු කොටස් මිල දර්ශකය” (ASPI) ඉහළම අගය අද (18) දින වාර්තා කර තිබේ.
දිනයේ ගනුදෙනු අවසානයේ දී “සියලු කොටස් මිල දර්ශක” අගය ඒකක 7,922.66ක් ලෙසින් දැක්වුණු අතර එය පෙර දිනයට සපේක්ෂව ඒකක 188.09ක ඉහළයාමක් ලෙස දැක්වේ.
මීට පෙර “සියලු කොටස් මිල දර්ශකයේ” වැඩිම අගය 2011 පෙබරවාරි 14 දින වාර්තා වූ අතර එම අගය ඒකක 7,811.80 කි.
අද දින රු. බිලියන 12.18 ක ගනුදෙනු පිරිවැටුමක් වාර්තා විය. එහිදී එක්ස්පෝලංකා (රු. බි. 1.55), බ්‍රවුන්ස් ඉන්වෙස්ට්මන්ට්ස් (රු.බි. 1.35), LOLC හෝල්ඩිංග්ස් (රු.බි. 1.31) සමාගම්වල රුපියල් බිලියනය ඉක්මවූ කොටස් ගනුදෙනු වාර්තා වී තිබුණි.
මේ අතර අද දින කොටස් ගනුදෙනු 67,000කට අධික ගණනක් වාර්තා වී ඇති අතර එය මෙතෙක් ඉතිහාසයේ තනි දිනක් තුළ සිදුවූ වැඩිම ගනුදෙනු සංඛ්‍යාව වේ.