ශ්‍රීලංකාව හා දකුණු අප්‍රිකාව අතර දකුණු අප්‍රිකාවේ ජොහැන්නස්බර්ග් නුවර දී පැවැත්වුනු දෙවන ටෙස්ට් ක්‍රිකට් තරගයෙන් ජයගත් දකුණු අප්‍රිකාව දින තුනකදී තරගය අවසන් කළහ. දෙවන දිනය අවසන් වන විට තම දෙවන ඉනිම ක්‍රීඩා කරන ශ්‍රීලංකා කණ්ඩායම කඩුලු හතරකට ලකුණු 150 ක් ලබා සිටි අතර තුන් වන දිනයේ ලකුණු 211 කට සියලුම ක්‍රීඩකයන් දැවී ගියහ. ශ්‍රීලංකා කණ්ඩායමේ අවසන් කඩුලු හය ලකුණු 35 ක් තුල බිඳ වැටිණි. ශ්‍රීලංකා කණ්ඩායමේ දෙවන ඉනිම වෙනුවෙන් දිමුත් කරුණාරත්න ලකුණු 103 ක් ලබා ගත්තේය.ජයග්‍රහණය සඳහා අවශ්‍ය වූ ලකුණු 67 කිසිදු ක්‍රීඩකයකු නොදැවී ලබා ගන්නට දකුණු අප්‍රිකාව සමත් විය.
දකුණු අප්‍රිකානු කණ්ඩායමේ පළමු ඉනිම ලකුණු 302කට සීමා කිරීමට ශ්‍රී ලංකා කණ්ඩායම සමත් වුවද එම වාසිය ලබා ගන්නට ශ්‍රීලංකා පිතිකරුවෝ අපොහොසත් වුහ. ශ්‍රී ලංකා කණ්ඩායම තම පළමු ඉනිමට ලබාගත්තේ ලකුණු 157 ක් පමණි. මේ අනුව ටෙස්ට් තරගාවලිය 2-0 ලෙස දකුණු අප්‍රිකාව ජය ගත්තේය.