නවසීලන්තයේදී පැවැත්වෙන පකිස්ථාන-නවසීලන්ත පළමු ටෙස්ට් ක්‍රිකට් තරගයෙන් නවසීලන්තය අවසන් පැයේදී ලකුණු 101 ක ජයක් අත් කර ගත්තේය.
පළමුව පන්දුවට පහර දුන් නවසීලන්ත කණ්ඩායම සියලුම දෙනා දැවී ලකුණු 431 ක් ලබා ගත්හ. පිළිතුරු වශයෙන් සිය ප්‍රථම ඉනිම සඳහා පකිස්ථාන කණ්ඩායම ලකුණු 239 ක් ලබා ගත්හ. සිය දෙවන ඉනිම වෙනුවෙන් නවසීලන්තය කඩුලු පහකට ලකුණු 180 ක් රැස්කර තිබියදී ඉනිම අත්හිටුවා පකිස්ථානයට දෙවැනි ඉනිම සඳහා ආරාධනා කරන ලදී.
ලකුණු 373 ක ඉලක්කයක් හඹා ගිය පකිස්ථාන දෙවන ඉනිම ලකුණු 271 කට සීමා විය. පකිස්ථානයේ දෙවන ඉනිමේදී ෆවාඩ් අලාම් ලකුණු 102 ක් රැස් කරමින් තරගය ජය පරාජයෙන් තොරව අවසන් කර ගැනීමට දැඩි උත්සහයක් ගත්තේය. නවසීලන්තය දෙවන ටෙස්ට් තරගය ජයග්‍රහණය කලහොත් ලෝක ටෙස්ට් ක්‍රිකට් තරගාවලියේ අවසන් මහා තරගය සඳහා තරගවැදීමට අවස්ථාව හිමිවීමටද ඉඩ තිබේ. ලෝක ටෙස්ට් ශුරතාවලියේ අවසන් මහා තරගය ලබන වසරේ එංගලන්තයේ ලෝඩ්ස් ක්‍රීඩාංගනයේදී පැවැත්වේ.