රට තුල ඇතිව තිබෙන පොල් හිඟය හේතුවෙන් ශ්‍රී ලංකාව ඉන්දුනීසියාවෙන් පොල් නිෂ්පාදන ආනයනය කිරීමට රජය අපේක්‍ෂා කරයි.
කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති සහ වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහත්වරුන් විසින් ඒ සදහා ඒකාබද්ධ කැබිනට් පත්රිකාවක් මේ සතියේ ඉදිරිපත් කිරීමට නියමිතව ඇත.
එය ඉතා ඉක්මනින් අමාත්‍ය මණ්ඩල අනුමැතියට යොමු කිරීමට කටයුතු සිදු කරමින් පවතී.
මෙම පොල් හිඟ කාලයේදී පොල්ගෙඩි මිලියන 200 කට අදාල වන පොල් ප්‍රමාණයක් පොල් කිරි, පිටි සහ සීත කල පොල් මද යන කාණ්ඩ තුන යටතේ අනනයන කිරීමට අවසර දෙනු ඇත. ඒ අවසර දෙනු ලබන්නේ ප්‍රති අපනයන කටයුතු සඳහා පමණී.
වැවිලි සහ ප්‍රජා යටිතල පහසුකම් අමාත්‍යංශ ලේකම් හා කර්මාන්ත අමාත්‍යංශ ලේකම් විසින් කමිටුවක් පිහිටුවන අතර එම එක් එක් ආයතනය සඳහා අවශ්‍ය වන එම පොල් ප්‍රමාණය කමිටුව විසින් නිර්දේශ කරනු ලබන අතර එම නිර්දේශය වැවිලි සහ ප්‍රජා යටිතල පහසුකම් අමාත්‍යංශ ලේකම් විසින් කර්මාන්තඅමාත්‍යංශ ලේකම් වෙත යවනු ලබයි.
කමිටුවේ අනුමැතිය අනුව එම පොල් ප්‍රමාණය ආනයනය කරනු ලබයි. මෙම කර්මාන්තය සඳහා දැනට ඇති පොල් අස්වැන්න අප්‍රේල් වන තුරුම ප්‍රමාණවත් නොවන බැවින් එම කර්මාන්තය රැක ගැනීමේ අරමුණින් එම තීරනය ගනු ලැබේ.
තවද දේශීය පොල් තෙල් කර්මාන්තය සඳහා කොප්පරා නොවන, වියලි කල හෝ කැබලි කරන ලද පොල් කැබලි ආනයනයට අවශ්‍ය අවසර ලබා දීමේ කටයුතු සිදු කරමින් පවති. ඒ සඳහා අවශ්‍ය ප්‍රමාණයද කමිටුවක් මගින් තීරණය කරනු ලබයි. දේශිය පරිබෝජනයට ඇති මෙම පොල් තෙල් කර්මාන්තය සඳහා අවශ්‍ය අමුද්‍රව්‍ය බදු සහනයක් යටතේ ආනයනය සඳහා අදාළ කැබිනට් පත්රිකාවක් සකස් කර ඇති අතර, එම කැබිනට් පත්‍රිකාව ද කැබිනට් අනුමැතිය සඳහා යොමු කිරීමට අවශ්‍ය කටයුතු සිදු කර ඇත.