“හැමදේම ආනයනය කොට අලෙවි කරන්න පහසුයි. එහෙම කළොත් ශක්තිමත් ආර්ථිකයක් ගොඩනගන්න බැහැ. ආර්ථික වර්ධනය සිදු විය යුත්තේ සමාජයේ සෑම ස්ථරයක්ම ආරක්ෂා වන අයුරින්. ඒ සඳහා පෞද්ගලික අංශයේ දායකත්වය සහ නව ප්‍රවේශයන් ඉතා වැදගත්” ජනාධිපති ගෝඨාභය රාජපක්ෂ මහතා පෞද්ගලික අංශයේ ව්‍යවසායකයන් සමග පසුගියදා ජනාධිපති කාර්යාලයේ දී කළ සාකච්ඡාවේදී ප්‍රකාශ කල බව ජනාධිපති මාධ්‍ය අංශය පවසයි
ආර්ථිකයේ සෑම ක්ෂේත්‍රයකම සමබර වර්ධනයක් ඇති කිරීම සිය අරමුණ බව කී ජනාධිපතිවරයා ඊට ඉවහල් වන ක්‍රියාමාර්ග ඉදිරිපත් කරන ලෙසත්, ඒ සඳහා ඇති බාධක හඳුනාගන්නා ලෙසත් පෞද්ගලික අංශයට යෝජනා කර තිබේ.
විශේෂයෙන් කොවිඩ් 19 ව්‍යාප්තිය නිසා අඩාල වූ ආර්ථිකය යළි සක්‍රීය කොට දිගුකාලීන ආර්ථික සංවර්ධනයක් අත්කර ගැනීම පරමාර්ථය කොට ගෙන ජනාධිපතිවරයා පෞද්ගලික ව්‍යවසායකයන් කණ්ඩායම් වශයෙන් හමුවීමට මෑතකදී තීරණය කළේය.
ඒ අනුව මෙම රැස්වීම පැවැත්වුණේ දෙවැනි කණ්ඩායම සමගය. සංචාරක ව්‍යාපාරය, ගොඩනැගිලි සහ මාර්ග ඉදිකිරීම්, සන්නිවේදන තාක්ෂණය, හෝටල් ව්‍යාපාරය, ශාඛ නිෂ්පාදන, පශු නිෂ්පාදන, කිරි කර්මාන්තය, ලුණු නිෂ්පාදනය, කෘෂි නිෂ්පාදන, සුළු අපනයන භෝග, කාබනික ගොවිතැන ආදී ක්ෂේත්‍ර ගණනාවක ප්‍රමුඛ පෙලේ ආයතනවල ප්‍රධානීහූ සාකච්ඡාවට එක්ව සිටියහ.
ශක්තිමත් ආර්ථිකයක් ගොඩනැගීමට ජනාධිපති රාජපක්ෂ මහතා අනුගමනය කරන ස්ථීර සාර සහ විධිමත් ප්‍රතිපත්ති ගැන ප්‍රසාදය පළ කළ ව්‍යවසායකයෝ 2021 අයවැයෙන් ආර්ථික අභිවෘද්ධිය සදහා සපයා ඇති සහන පිළිබඳව මහත් සේ පැසසුම් කළහ.
තම ව්‍යාපාරික ක්ෂේත්‍රවල වත්මන් තත්ත්වය ගැන ජනාධිපතිවරයාට පැහැදිළි කළ ව්‍යවසායකයෝ තමන් වර්තමානයේ මුහුණ දෙන ගැටළුද විස්තර කළහ. පුහුණු ශ්‍රම හිඟය, ආයතිනක අකාර්යක්ෂමතාව, ගොඩනැගිලි ද්‍රව්‍ය හිඟය, ඇතැම් ශ්‍රමිකයන්ගේ උදාසීනතාව සහ නව වෙළෙඳපොළ සොයා ගැනීමේ අපහසුව ඔවුන් සඳහන් කළ ප්‍රධාන ප්‍රශ්න අතර විය.
“සමාජයේ සෑම ස්ථරයකටම ඉහළ ආර්ථික ශක්තියක් අත්කර දීම ප්‍රමුඛ අවශ්‍යතාවක්. අපේ රටේ ජනගහණයෙන් 35%ක් ගොවීන්. ජනගහණයෙන් 70%කම ජීවනෝපායට කෘෂිකර්මාන්තයේ සම්බන්ධතාවක් තිබෙනවා. මේ ක්ෂේත්‍රයේ ඵලදායීතාව වර්ධනය කරන අතර, තරුණයන් ඊට ආකර්ශණය කරගත යුතුයි” යනුවෙන් මෙහිදී ජනාධිපතිවරයා පැවසීය.
ව්‍යවසායකයන් මුහුණ දෙන ගැටළු අධ්‍යයනය කොට විසඳුම් සපයන බව ජනාධිපතිවරයා මෙහිදී ව්‍යවසායකයන්ට දැනුම් දුන්නේය.
ජනාධිපති ලේකම් පී.බී. ජයසුන්දර, ආයෝජන මණ්ඩලයේ සභාපති සංජය මොහොට්ටාල යන මහත්වරු ද සාකච්ඡාවට සහභාගී වූහ