ඉන්ධන මිල අඩු වූවාට පාන් ඇතුළු බේකරි නිෂ්පාදන වල මිල දැන්ම අඩු කළ නොහැකි බව සමස්ත ලංකා බේකරි හිමියන්ගේ සංගමයේ සභාපති එන්. කේ. ජයවර්ධන මහතා පවසයි.
මීට පෙර ඉන්ධන මිල වැඩි වුණු අවස්ථා වලදී සහ අඩුවුණු අවස්ථාවලදී බේකරි නිෂ්පාදන වල මිල වැඩි හෝ අඩු නොකළ බව ප්‍රකාශ කළ ඒ මහතා එළැඹෙන සිංහල අවුරුදු සමය වන විට ඉන්ධන මිල තවත් අඩු වී ආනයනික බිත්තර හිඟයක් නොමැති ව බේකරි වලට ලැබෙන්නේ නම් එම සහනය සිංහල අවුරුද්දට ජනතාවට ලබාදීම සඳහා පාන්, කේක් ,ඇතුළු බේකරි නිෂ්පාදනවල මිල අනිවාර්යෙන්ම අඩු කරන බවද පැවසීය.
බේකරි නිෂ්පාදනවල මිල අඩු කිරීමට තරම් මෙවර ඉන්ධන මිල සංශෝධනය වී නොමැති බවත් බේකරි කර්මාන්තයේ දී ඩීසල් ,පෙට්රල්, භූමිතෙල්, ගෑස් සහ දර උපයෝගී කර ගන්නා බවද පැවසූ ජයවර්ධන මහතා දිනකට බේකරි වලට පමණක් බිත්තර ලක්ෂ හතළිහක් පමණ සහ ඉන්ධන විශාල ප්‍රමාණයක් අවශ්‍ය වන බවද කියා සිටියේය.