ජනශක්ති රක්ෂණ සමූහ ව්‍යාපාරයේ අධ්‍යක්ෂ දිනේෂ් ෂාෆ්ටර් මහතාගේ මරණයට අදාළව රජයේ රස පරීක්ෂකවරයා වෙත යැවූ නඩු භාණ්ඩවල මරණකරුට අමතරව තවත් ආගන්තුකයකුගේ ජෛව සාම්පලයක් (ඩී එන් ඒ) ඇතුළත්ව ඇතැයි රස පරීක්ෂක වාර්තාවේ සදහන් වන බව අපරාධ පරික්ෂණ දෙපාර්තමේන්තුව කොළඹ අතිරේක මහේස්ත්‍රාත් රජින්ද්‍රා ජයසූරිය මහත්මිය ඉදිරියේ අද (14) කරුණු වාර්තා කළේය.
මෙම සිද්ධියට අදාළ සැකකරුවන් සිටීනම් හෝ එම අපරාධ ස්ථානයට මුලින් පැමිණී අයවලුන් අදාළ ඩී එන් ඒ රටා සමග සසැදීම සඳහා ලබන 20 වැනිදා තමන් වෙත යොමු කරන ලෙසට රජයේ රස පරීක්ෂකවරයා තමන්ට දැනුම් දී ඇතැයි ද මෙහිදී අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මියගිය දිනේෂ් ෂාෆ්ටර් මහතාගේ ශරීර කොටස් කොළඹ මහ රෝහලේ ප්‍රධාන අධිකරණ වෛද්‍ය නිලධාරී කාර්යාලයෙහි සාම්පල් වශයෙන් තබාගෙන ඇත්නම් අධිකරණය දැනුම් දෙන තෙක් ඒවා විනාශ කිරීමට හෝ වෙනස් කිරීමට හෝ පියවර නොගන්නා ලෙසට ද මහේස්ත්‍රාත්වරිය කොළඹ ප්‍රධාන අධිකරණ වෛද්‍ය නිලධාරී අජිත් තෙන්නකෝන් මහතා වෙත නියෝගයක් නිකුත් කළාය.
එසේම සාම්පල් වශයෙන් තබාගෙන තිබූ මරණකරුගේ ශරීර කොටස් අධිකරණයේ අවසරයකින් තොරව විනාශ නොකරණ ලෙසත් ඒවා ඉතාමත් සුරක්ෂිතව තබා ගන්නා ලෙසත් අධිකරණයෙන් රජයේ රස පරීක්ෂකවරයාට ද නියෝගක් නිකුත් කෙරිණී.