ව්‍යවස්ථා සංශෝධනයට මුවාවී රටට හානිකර යෝජනා ගෙනාවොත් විසි දෙවැනි ආණ්ඩුක්‍රම ව්‍යවස්ථා සංශෝධනය පරාජයට පත් කරන බව අනුරාධපුර දිස්ත්‍රික් පාර්ලිමේන්තු මන්ත්‍රී මහාචාර්ය චන්න ජයසුමන මහතා පැවසීය.
ඔහු මෙසේ පැවසුවේ හොරොව්පතාන මොරවැව ප්‍රදේශයේ පැවති උත්සවයකින් අනතුරුව මාධ්‍යයට අදහස් දක්වමිනි.
ලබන බ්‍රහස්පතින්දා සහ සිකුරාදා විවාදයට ගැනීමට නියමිත විසිදෙවන ආණ්ඩුක්‍රම ව්‍යවස්ථා සංශෝධන පනත කාරක සභා අවස්ථාවට යොමු කරන අවස්ථාවේදී විවිධාකාර නව යෝජනා ගෙන ඒමට සැලසුම් කර ඇතැයි වාර්තා පළවන බවත්, ඒආකාරයෙන් නව සංශෝධන ගෙනඒමට බලාපොරොත්තු වන්නේ නම් විවාදය ආරම්භ වන බ්‍රහස්පතින්දා උදෑසනම ඒ පිළිබඳව රටට පවසන ලෙසත් ඔහු ප්‍රකාශ කළේය.
ශ්‍රේෂ්ඨාධිකරණය දක්වා ඇති වෙනස්කම් හැරුණු විට කිසිදු නව යෝජනාවක් කාරක සභා අවස්ථාවේදී ඉදිරිපත් කිරීම නුසුදුසු බවද හෙතෙම පෙන්වා දුන්නේය.
රට අසීරුතාවට පත්ව ඇති මේ අවස්ථාවේ අවස්ථාවාදීන්ට අවශ්‍ය ආකාරයට රටේ ව්‍යවස්ථාව වෙනස් කිරීමට ඉඩප්‍රස්ථා සැලසීම මහ ද්‍රෝහී කටයුත්තක් බව මහාචාර්ය චන්න ජයසුමන මහතා වැඩිදුරටත් පැවසීය.