දේශපාලන ගේම් නිසා 21 වන ආණ්ඩුක්‍රම ව්‍යවස්ථා සංශෝධනය අනතුරට පත්ව ඇතැයි විපක්ෂ නායක සජිත් ප්‍රේමදාස මහතා කොළඹ දී අද (15)පැවසීය.
අධිකරණ ඇමතිගේ 21 ආණ්ඩුවේ 21, විපක්ෂයේ 21 කියා දෙයක් නොමැති බවත්, දැනට තිබෙන එකම 21 වන්නේ රංජිත් මද්දුමබණ්ඩාර මහතා පෞද්ගලික මන්ත්‍රී යෝජනාවක් ලෙස ගෙන ආ 21 බවත් විපක්ෂ නායකවරයා සඳහන් කළේය.
ඊට අදාළ ශ්‍රේෂ්ඨාධිකරණ මතය දින කිහිපයකින් නිකුත් වනු ඇතැයි පැවසූ විපක්ෂ නායකවරයා පාර්ලිමේන්තුවේ තුන්වන සතියේදී එය සාකච්ඡාවට ගත හැකියැයිද පැවසීය.
රටේ පවතින්නේ ප්‍රතිසංස්කරණ වලට වඩා දේශපාලන ගේම් නිසා එය සාකච්ඡාවට නොගන්නා තත්ත්වයක් උද්ගතව ඇතැයි ද ඔහු පැවසීය.
එබැවින් අද පවත්නා දේශපාලන අර්බුදයට විසදුම ඇත්තේ නව ජනවරමක් තුළ යැයිද ප්‍රේමදාස මහතා කීවේය.
ප්‍රතිසංස්කරණ සඳහා වූ ජාතික ව්‍යාපාරයේ නියෝජිත පිරිසක් කොළඹ මාක්ස් ප්‍රනාන්දු මාවතේ විපක්ෂ නායක කාර්යාලයේ දි හමුවු අවස්ථාවේදී විපක්ෂ නායකවරයා මේ බව පැවසීය.