ඇමතිවරු අටදෙනෙක් ජනාධිපති ගෝඨාභය රාජපක්ෂ මහතා ඉදිරියේ ජනාධිපති මන්දිරයේ දී අද (23)පෙරවරුවේ දිවුරුම් දුන්හ
ආචාර්ය බන්දුල ගුණවර්ධන මහතා ප්‍රවාහන ,මහාමාර්ග හා ජනමාධ්‍ය ඇමතිවරයා වශයෙන් ද,විදුර වික්‍රමනායක මහතා බුද්ධ ශාසන , ආගමික හා සංස්කෘතික කටයුතු ඇමැතිවරයා වශයෙන් ද ,රොෂාන් රණසිංහ මහතා වාරිමාර්ග ,ක්‍රීඩා හා යෞවන කටයුතු අමාත්‍යවරයා වශයෙන් ද,අහමඩ් නසීර් මහතා පරිසර ඇමැතිවරයා වශයෙන් ද දිවුරුම් දුන්හ.
ඊපීඩීපී නායක ඩග්ලස් දේවානන්ද මහතා ධීවර අමාත්‍යවරයා වශයෙන් දිවුරුම් දුන් අතර,ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති වරයකු වන මහින්ද අමරවීර මහතා කෘෂිකර්ම, වනජීවී හා වන සම්පත් සංරක්ෂණ අමාත්‍ය වශයෙන් දිවුරුම් දුන්නේය.
කැබිනට් මණ්ඩලය අමාත්‍යවරුන් ලෙස කලින් දිවුරුම් දුන් කෙහෙළිය රඹුක්වැල්ල සහ වෛද්‍ය රමේෂ් පතිරණ යන මහත්වරුන් එම අමාත්‍ය ධුරවලට අමතරව , තවත් අමාත්‍යධුර දෙකක දිවුරුම් දීම ද විශේෂත්වයක් විය.
ඒ අනුව ,කෙහෙළිය රඹුක්වැල්ල මහතා සෞඛ්‍ය අමාත්‍ය ධුරයට අමතරව, ජල සම්පාදන අමාත්‍යවරයා ලෙස දිවුරුම් දුන් අතර, වෛද්‍ය රමේෂ් පතිරණ මහතා වැවිලි ඇමැතිධුරයට අමතරව කර්මාන්ත ඇමතිවරයා ලෙස දිවුරුම් දුන්නේය.