මෙවර අ.පො.ස සාමාන්‍ය පෙළ විභාගයට පෙනී සිටින දරුවන් වෙනුවෙන් අමතර බස් රථ යොදවන බව ලංකා ගමනා ගමන මණ්ඩලයේ සභාපති කිංස්ලි රණවක මහතා පැවසීය.
විභාග මධ්‍යස්ථාන වෙත පැමිණෙන දරුවන් වෙනුවෙන් සිසු සැරිය බස්රථ මෙන්ම තවත් අතිරේක බස් රථ යොදවන බව ඔහු සඳහන් කළේය.
විභාග කාර්ය මණ්ඩල හා විභාග මධ්‍යස්ථාන කටයුතුවල නිරත වාහන වෙනුවෙන් ලං.ග.ම සතු ඉන්ධන ලබාදෙන ලෙස උපදෙස් දී ඇතැයි ද සභාපතිවරයා කීවේය.
සභාපතිවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (18) පැවති මාධ්‍ය හමුවක් අමතමිනි.
දුම්රියෙන් පැමිණෙන සිසුන් දුම්රිය ස්ථානවල සිට විභාග මධ්‍යස්ථාන කරා රැගෙනයාමේ වැඩපිළිවෙලක් ද සකසා ඇතැයි හෙතෙම පැවසීය.
නියෝජ්‍ය දුම්රිය සාමාන්‍යාධිකාරී වී.එස් පොල්වත්තගේ මහතා මෙහිදී අදහස් දක්වමින් පැවසුවේ සාමාන්‍ය දුම්රිය කාලසටහනේ ඇති පාසල් දරුවන් වෙනුවෙන් ධාවනය කරන දුම්රිය ගමන් වාර විභාගය පැවැත්වෙන කාලයේදී අඛණ්ඩව ක්‍රියාත්මක කරන බවයි.
විභාගයට කල්වේලා ඇතිව යාමට ඇති අවසන් දුම්රියෙන් නොව ඊට පෙර තිබෙන දුම්රියෙන් විභාග මධ්‍යස්ථානයට යන ලෙස සිසුන්ට දැනුම් දෙන බවත්, දුම්රිය ප්‍රමාදයක් වුවහොත් සීඝ්‍රගාමී දුම්රිය දරුවන් වැඩි දුම්රිය ස්ථානවල නැවැත්වීමට උපදෙස් දී ඇතැයි ද පොල්වත්තගේ මහතා පැවසීය.