ශ්‍රී ලංකා නිදහස් පක්ෂය නව ආණ්ඩුවට සහාය දීමට තීරණය කර ඇති බව ආරංචිමාර්ග පවසයි.
ඒ අනුව ඔවුන් ඒ බව අග්‍රාමාත්‍ය රනිල් වික්‍රමසිංහ මහතා වෙත ලිඛිතව දැනුම් දී ඇත.
ආණ්ඩුවට සහාය දීම සම්බන්ධයෙන් ශ්‍රීලනිපය තුළ බෙදීමක් පැවති අතර පක්ෂ නායකත්වයේ මතය නොතකා හරිමින් කොටසක් ආණ්ඩුවට එක්වීමේ අවදානමක් ද පැවතිණි. බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් දසනායක මෙය එළිපිටමත් ප්‍රකාශ කර තිබිණි.
එහෙයින් පක්ෂය බෙදීම වළක්වා ගැනීම සඳහා වෙන් වෙන් වශයෙන් නොව කණ්ඩායමක් වශයෙන්ම ආණ්ඩුවට සහාය දීමටත් අමාත්‍ය තනතුරු භාරගැනීමටත් ඔවුන් තීරණය කර ඇත.
රට මුහුණදී සිටින ආර්ථික අර්බුදය විසඳීමට ආණ්ඩුව ගන්නා සියලුම නිවැරදි තීරණවලට ශ්‍රී ලංකා නිදහස් පක්ෂයේ සහාය ලැබෙන බව මෛත්‍රීපාල සිරිසේන මහතා පවසයි.
අග්‍රාමාත්‍යවරයා වෙත ලිපියක් යවමින් ඔහු ඒ බව සඳහන් කළේය.
ශ්‍රී ලංකා නිදහස් පක්ෂය සහ අගමැති අතර හමුවක් හෙට (16) පෙරවරුවේ පැවැත්වීමට නියමිතව ඇති බව දේශපාලන ආරංචි මාර්ග පවසයි.