ශ්‍රී ලන්කන් ගුවන් සේවයේ ප්‍රධානීන්ට පොදු ව්‍යාපාර පිළිබඳ පාර්ලිමේන්තු කාරක සභාව(කෝප් ) හමුවේ පෙනී සිටින ලෙස දැනුම්දී තිබුණද ඔවුහු එම කමිටුව හමුවේ ඊයේ(20) පෙනී නොසිටියහ.
යම් හදිසි තත්වයක් නිසා කමිටුව හමුවේ ඊයේ දිනයේ පෙනී සිටිය නොහැකි බව පවසා ඒ සඳහා වෙනත් දිනයක් ලබා දෙන්නැයි ශ්‍රී ලංකන් ගුවන් සමාගමේ ප්‍රධානීහු කෝප් කමිටුවෙන් ඉල්ලීමක් කළහ.
මේ අනුව කෝප් කමිටුව හමුවේ ලබන 25 වැනිදා සඳුදා පෙනී සිටින ලෙස එම කමිටුව ශ්‍රී ලංකන් ගුවන් සමාගමේ ප්‍රධානීන්ට දැනුම්දී ඇත.
ශ්‍රීලංකන් ගුවන් සමාගමට ගුවන් යානා තවත් විසි එකක් මිලදී ගැනීමට තීරණය කර ඇතැයි පළවූ වාර්තා පදනම් කරගෙන ඒ සම්බන්ධයෙන් කරුණු විමසීම සඳහා ශ්‍රී ලංකන් ගුවන් සමාගමේ ප්‍රධානීහු කෝප් කමිටුව හමුවට ඊයේ මෙසේ කැඳවනු ලැබ සිටියහ.
කෝප් කමිටුවේ සභාපති මහාචාර්ය චරිත හේරත් මහතා පසුගියදා පාර්ලිමේන්තුවේදී ප්‍රකාශයක් කරමින් පැවසුවේ ඒ කාරණය සම්බන්ධයෙන් තමා විගණකාධිපතිවරයා සමගද සාකච්ඡා කළ බවයි.
ඒ සම්බන්ධයෙන් විමර්ශනයක් පවත්වා වාර්තාවක් පාර්ලිමේන්තුවට ඉදිරිපත් කරන බව ඔහු එහිදී වැඩිදුරටත් පැවසුවේය.
ශ්‍රී ලංකන් ගුවන් සමාගම මෙරට පාඩු ලබන ප්‍රධාන ආයතන අතර අංක එකට පවතින්නකි.