විපක්ෂ නායක සජිත් ප්‍රේමදාස මහතා ළඟ සිටින මන්ත්‍රීවරුන් දහ දෙනකු එක්සත් ජාතික පක්ෂයේ නායක රනිල් වික්‍රමසිංහ මහතා සමඟ ළඟදීම එක්වීමට නියමිතව ඇතැයි කෘෂිකර්ම අමාත්‍ය මහින්දානන්ද අලුත්ගමගේ මහතා පාර්ලිමේන්තුවේදී අද (24) පැවැසීය.
සමගි ජන බලවේගයේ මන්ත්‍රීවරුන් දසදෙනකු රනිල් වික්‍රමසිංහ මහතා සමඟ ඒ සම්බන්ධයෙන් සාකච්ඡා අරඹා ඇතැයි පැවසූ අමාත්‍යවරයා මන්ත්‍රීවරුන් දසදෙනකු වික්‍රමසිංහ මහතාට එකතුවීමට දැනටමත් කැමැත්ත පළ කර ඇති බවද සඳහන් කළේය.
අලුත්ගමගේ මහතා මෙසේ පැවසූවේ විපක්ෂ නායක සජිත් ප්‍රේමදාස මහතා රටේ ආහාර ප්‍රශ්නය සම්බන්ධයෙන් ප්‍රශ්නයක් මතු කළ අවස්ථාවේදී ඇතිවූ සංවාදයකදීය.
මහින්දානන්ද අලුත්ගමගේ මහතා එහිදී මෙසේද ප්‍රකාශ කළේය.
විපක්ෂ නායකතුමනි. මම ඒ යන අයගේ නම් කියන්නද.නම්වල මුල් අකුරු විතරක් කියන්නම්. හ යන්නෙන් එක්කෙනයි. එ යන්නෙන් එක්කෙනයි. ර යන්නෙන් එක්කෙනයි. ස යන්නෙන් එක්කෙනයි. දැන් ඔය නම් ටික බලා ගත්ත නම් හරි.
ආචාර්ය හර්ෂ ද සිල්වා මහතා:
මම විතරක් නොවෙයි. අපේ කණ්ඩායමම ඔය පැත්තට එනව.
අලුත්ගමගේ මහතා:
ඒව ඉතින් දවල් හීන.මුදල් ඇමැතිකම ගන්න මෙයා දැන් ත්‍රීවිල් එකේ යනවා.