දිවයින පුරා සමෘද්ධි ප්‍රතිලාභීන් හට වැඩි කල සියයට 28 ක සමෘද්ධි දීමනාව හෙට(14) දින සිටලබා දීමට කටයුතු කරන බව සමෘද්ධි, ගෘහ ආර්ථික ක්ෂුද්‍ර මූල්‍ය ස්වයං රැකියා හා ව්‍යාපාර සංවර්ධන රාජ්‍ය අමාත්‍ය ෂෙහාන් සේමසිංහ මහතා පැවැසීය.
ඒ අනුව මෙතෙක් රුපියල් 3500 ක දීමනාවක් ලැබු පවුල් ඒකකයක් සඳහා රුපියල් 4500 ක දීමනාවකුත්, රුපියල් 2500 ක දීමනාවක් ලැබූ පවුල් ඒකකයක් සඳහා රුපියල් 3200 ක දීමනාවකුත්, රුපියල් 1500 ක දීමනාවක් ලැබූ පවුල් ඒකකයක් සඳහා රුපියල් 1900 ක දීමනාවකුත් ලබාදිමට කටයුතු කරන බව රාජ්‍ය අමාත්‍යවරයා ප්‍රකාශ කළේය.
2022 වර්ෂය තුල සමෘද්ධි ප්‍රතිලාභීන් සදහා දීමනා ලබා දීමට රුපියල් මිලියන 65,000 ක මුදලක් වැය කිරීමට රජය අපේක්ෂා කරන බවත් හෙතෙම කීවේය.
රටේ පවතින කොවිඩ් 19 වසංගත තත්ත්වය හේතුවෙන් බල පෑමට ලක් වු සියලු පාර්ශවයන්ට විවිධ සහන ලබා දීමට 2022 වර්ෂය සඳහා අය වැය පොරොන්දුවක් මත මෙම දීමනා ලබාදෙන බවත් රාජ්‍ය අමාත්‍යවරයා ප්‍රකාශ කළේය.
සමෘද්ධි ප්‍රතිලාභීන් ලෙස දිවයින පුරා සිටින දාහත් ලක්ෂ හැට හත්දහසක පවුල් ඒකක සංඛ්‍යාවක් සදහා වැඩි කල 28% ක සමෘද්ධි දීමනාවේ ප්‍රතාලාබ හිමිවන බවත් ඔහු වැඩිදුරටත් කීවේය.