කොළඹ ජාතික රෝහලේ අධි සත්කාර ඒකක (එච්.ඩී.යූ.) දෙකේම ඇඳන් සියල්ලම අද වන විට ‘කොවිඩ්’ රෝගීන්ගෙන් පිරීගොස් ඇති බව කොළඹ ජාතික රෝහලේ දැඩි සත්කාර ඒකකයේ විශේෂඥ වෛද්‍ය ඇන්තනී මෙන්ඩිස් මහතා පැවසීය.
එම අධි සත්කාර ඒකක දෙකේ මීට සතියකට පමණ පෙර ඉතාමත් සුළු රෝගීන් සංඛ්‍යාවක් සිටි බව කී විශේෂඥ වෛද්‍ය ඇන්තනී මෙන්ඩිස් මහතා රටපුරා රෝගීන් ජාතික රෝහලට ඇතුළත් වන නිසා මෙය රැල්ලක් බවට පත්ව ඇති බව ද සඳහන් කළේය.
‘කොවිඩ්’ ආසාදිතයන් සමාජය තුළ වැඩිවෙත්ම ඉන් පිරිසක් දැඩි සත්කාර ඒකකවලට (අයි.සී.යූ.) යොමු වන බවත් ආසාදිතයන් වැඩිවීමත් සමඟ අයි.සී.යූ. සහ එච්.ඩී.යූ. ඒකකවල ප්‍රතිකාර ලබන රෝගීන්ගේ ප්‍රතිශතය ද ඉහළ යන බවත් විශේෂඥා වෛද්‍යවරයා කීය.
‘කොවිඩ්’ ආසාදිතයන්ගේ සංඛ්‍යාව වැඩි වේගයෙන් වැඩිවෙමින් තියෙන බව කී විශේෂඥ වෛද්‍ය ඇන්තනී මෙන්ඩිස් මහතා එය පාලනය කිරීමට එකම මාර්ගය එන්නත්කරණය බව ද වැඩි දුරටත් පැවසීය.