සතොස ආයතනයේ දූෂණ වංචා ඇතුලු විවිධ අක්‍රමිකතාවලට එරෙහිව කටයුතු කිරීමත් සමග කලබලවී ඇති ඇමැතිවරුන් දෙදෙනා තමා එම තනතුරින් ඉවත් කිරීමට සැලසුම් සහගත වැඩපිළිවෙළක් අරඹා ඇතැයි පාරිභෝගික කටයුතු අධිකාරියේ විධායක අධ්‍යක්ෂ තුෂාන් ගුණවර්ධන මහතා පැවැසීය.
එසේම තමාගේ ජීවිතයට දිගින් දිගටම මරණීය තර්ජන එල්ලවෙමින් පවතින හෙයින් සිදුවූ සියලු දේ ජනාධිපතිවරයාට ලිපියකින් දැනුම්දී තමා පාරිභෝගික කටයුතු අධිකාරියේ විධායක අධ්‍යක්ෂ ධූරයෙන් ජීවිත ආරක්ෂාව සඳහා ඉවත් වන බවද හෙතෙම සඳහන් කළේය.
ජාත්‍යන්තර පාරිභෝගික දිනය සැමරීම සඳහා යැයි පවසමින් පසුගිය මාර්තු මාසයේදී රුපියල් ලක්ෂ හතරක මුදලක් ඉල්ලන ලද අවස්ථාවේදී දේශපාලන වැඩවලට යොදා නොගෙන එම මුදල් පාරිභෝගිකයාට සෙතක් වන ආකාරයට යොදවන ලෙස තමා දැනුම් දුන් බවත් ඇමැතිවරුන් දෙදෙනා තමා සමග උරණ වූයේ එම සිද්ධියෙන් පසුව බවත් විධායක අධ්‍යක්ෂවරයා කීවේය.
ඔවුන් දෙදෙනා තමා ආයතනයෙන් පැන්නීමට එදින සිට විවිධ උත්සාහ ගත් බවද ඔහු පැවසුවේය.
තමා වැටුපක් හෝ නිල රථයක් හෝ වෙනත් වරප්‍රසාද වෙනුවෙන් පැමිණි සහ වැඩ කළ පුද්ගලයකු නොවන බව පැවසූ තුෂාන් ගුණවර්ධන මහතා අවංකව වැඩ කළ තමාට බලපෑම් කිරීමට ඇමැතිවරයාට හැකියාවක් නැතැයිද සඳහන් කළේය.
සුදුලූනු වංචාවට එරෙහිවද අදාළ අංශ වලට පැමිණිලි කරමින් තමා දිගටම කටයුතු කළ බවත් එම සිද්ධියද මේ රටේ සිදුවූ ලොකු “ගේම්” එකක් බවත් හෙතෙම කීවේය.
එම ගේම් එකට පහළ සිට ඉහළට බොහෝ පිරිසක් සම්බන්ධවී ඇති බවත් මෙයට පෙර උඳු කන්ටේනරයක්, සීනි සහ පිටි සම්බන්ධයෙන්ද මෙවැනිම ආකාරයේ ගනුදෙනුවක් සිදුවූ බවත් ගුණවර්ධන මහතා පෙන්වා දුන්නේය.
සුදුළූනු වංචාවට සම්බන්ධවී ඇත්තේ කාලයකට පෙර වැඩ තහනමට ලක්වූ පිරිසක් යැයි පැවසූ හෙතෙම එම පිරිස හිඟ වැටුප්ද ගෙවා නැවත රක්ෂාවලට මෑතදී බඳවා ගෙන ඇතැයිද ප්‍රකාශ කළේය.
රේගුවෙන් නිකුත් කෙරුණු සුදුලූනු ඇතුළු භාණ්ඩ සතොසට බඩු සපයන පුද්ගලයාට ලබාදී පසුව ඒවා සතොසට වැඩි මිල ගණන් වලට ලබා ගැනීම එම ජාවාරම බවත් මෙය නියෝජ්‍ය සාමාන්‍යාධිකාරීවරයකුට පමණක් තනිව කළ හැකි කටයුත්තක් නොවන බවත් ගුණවර්ධන මහතා පැවැසීය.
සුදු ලූනු කිලෝ 56,000ක් කියන්නේ සුළුපටු ප්‍රමාණයක් නොවන බවද ඔහු කීවේය.
සුදුලූනු කන්ටේනර දෙක සම්බන්ධයෙන් ක්‍රියාත්මකවීමත් සමඟ තමාට එරෙහිව දිගින් දිගටම මරණ තර්ජන පැමිණි බවත් ඒ සම්බන්ධයෙන් තමා අපරාධ පරීක්ෂණ දෙපාර්තමේන්තුවට පැමිණිලි කළද මෙතෙක් කිසිදු විමර්ශනයක්වී නැති බවත් විධායක අධ්‍යක්ෂවරයා සඳහන් කළේය.
තමා මෙම තනතුර බාර ගත්තේ රැකියාවක් නැති නිසා නොවන බව කී ගුණවර්ධන මහතා තමාට ආයතනයේ අද කෙලින් වැඩ කිරීමට නොහැකි තත්වයක් උදාවී ඇතැයිද ප්‍රකාශ කළේය.
තමා මෙම ආයතනයට පැමිණියේ සෞභාග්‍යයෙ දැක්ම ක්‍රියාත්මක කිරීමට බවත් අද ඒ දැක්ම ජනාධිපතිවරයාට පවා රටේ ක්‍රියාත්මක කිරීමට නොහැකි තත්වයක් උදාවී ඇති බවත් ඔහු කීවේය.
සෞභාග්‍යයෙ දැක්ම අද හුඟ දෙනෙකුට අමතකවී ඇතැයිද තුෂාන් ගුණවර්ධන මහතා පැවසීය.
දූෂිතයන්ට අද තමා තර්ජනයක්වී ඇති බවද පාන් පිටි කිරි පිටි හා සිමෙන්ති මිල වැඩි කිරීමට අදාළව සමාගම් සමඟ අත්සන් කිරීමට ගිය ගිවිසුම රටට අවාසිදායක හෙයින් තමා ඊටද අත්සන් නොකළ බව හෙතෙම පැවසුවේය.
රටේ අද මිල පාලනයේ පාලනයක් නැති බව පැවසූ හෙතෙම ගෑස්වල ගුණාත්මක තත්ත්වය සොයන ක්‍රමවේදයක්ද රටේ නැතැයි සඳහන් කළේය.
ගෑස් වල සංයුතියේ වෙනසක් ඇති හෙයින් එතන ප්‍රශ්නයක් ඇති බවත් එසේ නැතිනම් ගෑස් සිලින්ඩරයේ බර අඩු වැඩි වන්නේ කෙසේදැයි ප්‍රශ්න කිරීමට සිදුවන බවත් ඔහු කීවේය .
තමා රැකියාව දමා යෑම මාෆියාකාරයන්ගෙ ජයග්‍රහණයක් විය හැකි බව පැවසූ විධායක අධ්‍යක්ෂවරයා තමා තනතුරෙන් ඉවත්වූ පසු ස්ථිරයෙන්ම රටට අහිතකර ගිවිසුම් අත්සන් කරනු ඇතැයිද සඳහන් කළේය.
පාරිභෝගික කටයුතු පිළිබඳ අධිකාරියේ සභාපති විශ්‍රාමික මේජර් ජෙනරාල් ශාන්ත දිසානායක මහතා දූෂිතයකු හෝ වංචනිකයකු නොවන බවත් තමා මෙතෙක් කල් ආයතනයේ කටයුතු කළේ ඒ මහතා නිසා බවත් ඔහු පැවසුවේය.
තමා තනතුරින් ඉවත්වූ පසු තමාගේ පුටුවට හෙංචයියකු පත් කිරීමට සූදානම් වන බව දැනගන්නට ඇතැයි පැවසූ ගුණවර්ධන මහතා එවිට පාරිභෝගික කටයුතු අධිකාරිය ඇමැතිවරුන් දෙදෙනාගේ පෞද්ගලික සමාගමක් බවට පත්වනු ඇති බවත් ප්‍රකාශ කළේය.
තමාට එරෙහිව මෙම කුමන්ත්‍රණය කොතරම් දුරට ගොස් ඇත්දැයි කියනවා නම් තමාගේ දුරකතනයේ විස්තර පවා ඒ අය අදාල දුරකතන සමාගමෙන් අද ලබාගැනීමට කරමින් සිටින බව ඔහු වැඩිදුරටත් කීවේය.