වර්තමාන පාර්ලිමේන්තුවේ සිටින මන්ත්‍රීවරුන්ගෙන් සාතිශය බහුතරයකට මීළඟ මැතිවරණයකදී ජනතා ඡන්දයෙන් තේරී පත්වීමට ඉඩක් නොලැබෙන බව පාර්ලිමේන්තු මන්ත්‍රී විජේදාස රාජපක්ෂ මහතා පවසයි.
“අද මේ රටේ දේශපාලන පක්ෂ කියන ඒවා දියවෙලා ගිහිල්ලා ඉවරයි. දීර්ඝ කාලයක් තිබුණ රටේ ශක්තිමත්ම දේශපාලන පක්ෂය එක්සත් ජාතික පක්ෂය, අද ඒ පක්ෂයට අපේක්ෂකයකු ඉදිරිපත් කරගන්නවත් බැරි තත්වයට දුර්වල වෙලා ගිහිල්ලා තිබෙනවා. එජාප නායකයාට පවා අද පක්ෂයක් හොයාගන්න බැරිවෙලා තියෙනවා ඡන්දය ඉල්ලන්න. අනිත් පැත්තෙන් ගත්තාම පහුගිය මැතිවරණයේ ඡන්ද 69 ලක්ෂයක් ලබාගත් පොදුජන පෙරමුණ අපේක්ෂකයෙක් හොයාගන්න බැරිව මාස ගණනක් කටයුතු කරලා යන්තම් එක්කෙනෙක් හොයාගෙන තිබෙනවා. බොහොම පැහැදිලිව පෙනෙන්න තියෙන කාරණයක් තමයි ඔය වර්තමාන පාර්ලිමේන්තුවේ ඉන්න 225න් 25 දෙනෙකුවත් නැවත මන්ත්‍රීවරුන් විදියට තෝරලා පත්කරලා රටේ ජනතාව එවන්නෙ නෑ. ජාතික ජන බලවේගයට ගිය සැරේ 420,000 ක් තිබුණා. එතකොට ලක්ෂ 171ක් ඡන්ද දායකයො ඉන්න රටේ ලක්ෂ 4ක් තියෙන එක තමයි ඔය දකින්නෙ මහා බලවේගය කියලා. එතකොට අනිත් ඒවාට මොනවද කියන්නෙ ?”
විජේදාස රාජපක්ෂ මහතා මේ බව පැවසුවේ ජනාධිපතිවරණයට ඉදිරිපත් වීම සඳහා සිය නාමයෝජනා පත්‍රයට අත්සන් තැබීමෙන් අනතුරුව ඊයේ (14) පැවැත්වූ මාධ්‍ය හමුවක් අමතමිනි.