විනය සම්බුද්ධ ශාසනයේ ආයුෂය බව බුදුරජාණන් වහන්සේ දක්වා තිබේ. නිවැරදි ශාසනානුකූල ශ්‍රමණ ප්‍රතිපදාවක් පවත්වා ගැනීම පිණිස කැප වූ මහාවිහාර වංශික යති පරපුරෙන් පැවත එන ස්‍යාම නිකායික විනය කර්ම සම්ප්‍රදාය පිළිබඳ ගරුතර මහා සංඝරත්නය තුළ ප්‍රගුණත්වයක් ඇති කිරීම වෙනුවෙන් විනයකර්ම පුහුණු වැඩසටහනක් මහනුවර උපෝෂිත පුෂ්පාරාම විහාරදයාධිපති අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගලාභිධාන මහාවිහාර වංශික ස්‍යාමෝපාලි මහා නිකායේ ශ්‍රීමත් මහානායක ස්වාමීන්ද්‍රයන් වහන්සේගේ අනුශාසනා පරිදි මල්වතු මහාවිහාර පාර්ශ්වයේ බස්නාහිර පළාත් සංඝ සභාවේ සංවිධායකත්වයෙන් ඓතිහාසික වල්ගම්පාය රාජමහා විහාරාධිපති දිඹුල්කුඹුරේ ශ්‍රී සරණංකර විමලධම්මාභිධාන අනුනායක ස්වාමීන්ද්‍රයන් වහන්සේගේ ප්‍රධානත්වයෙන් රයිගම්පුර හොරණ ඓතිහාසික ඔලබොඩුව රාජමහා විහාරස්ථානයේ දී ජූලි මස 05 වන දින සන්ධ්‍යාවේ දී සිදු කෙරුණි. මහාචාර්ය මැදගොඩ අභයතිස්ස හිමියන් සහ ආචාර්ය මාවතගම පේමානන්ද හිමියන් විසින් ආරම්භක දෙසුම් සිදු කොට විනය කර්ම පැවැත්වීමේ ශාසනික වැදගත්කම ඇතුළු කරුණු පැහැදිලි කරන ලදි. කෝට්ටේ ශ්‍රී කල්‍යාණි සාමග්‍රිධර්ම මහාසංඝසභාවේ අනුනායක මකුරුප්පේ සෝමාලංකාර අනුනාහිමිපාණන් වහන්සේ වෙසෙසි දෙසුම සිදු කරමින් සංඝ සාමග්‍රියෙහි අගය පැහැදිලි කළහ.
සංඝ උපෝසථ දිනයක් වූ මෙදින නවක භික්ෂූන් වහන්සේලා වෙත පුහුණුවක් ලබා දීම පිණිස ඔලබොඩුව රජමහා විහාර පොහොය සීමාවේ දී මල්වතු මහා විහාර පාර්ශ්වයේ කාරක සංඝසභික රඹුක්වැල්ලේ ශ්‍රී සිද්ධාර්ථ බෝධිසීහ නන්දාරාම නාහිමිපාණන් වහන්සේගේ සහ මල්වතු මහාවිහාර ශ්‍රී සංඝරාජ පිරිවෙනේ නියෝජ්‍ය පරිවේණාධිපති වේඬරුවේ ආනන්දමූර්ති හිමියන්ගේ මූලිකත්වයෙන් ප්‍රාතිමෝක්ෂ දේශනාව සිදු කෙරුණි. ආචාර්ය පන්නිල ආනන්ද නාහිමි, වැලමිටියාවේ ඤාණරතන නාහිමි, තලගල සුමනරතන නාහිමි, අගලකඩ සිරිසුමන නාහිමි, ඔලබොඩුවේ ධම්මික නාහිමි ඇතුළු මල්වතු මහාවිහාර පාර්ශ්වයේ නායක ස්වාමීන්ද්‍රයන් වහන්සේලා ප්‍රමුඛ ශතාධික ස්ථවිර, මධ්‍යම හා නවක මහා සංඝ රත්නයේ සහභාගීත්වයෙන් සිදු කෙරුණි