එළඹෙන LPL තරගාවලිය සඳහා සහභාගීවීමට නියමිතව සිටි දඹුල්ල තන්ඩර්ස් කණ්ඩායමේ අයිතීන් වහාම ක්‍රියාත්මක වන පරිදි අත්හිටුවීමට කටයුතු කළ බව ලංකා ප්‍රිමියර් ලීග් නිවේදනය කළේය.
LPL සංවිධායක කමිටුවේ සභාපති අනිල් මෝහන් මහතා පැවසුවේ LPL තරගාවලියේ විනිවිදභාවය සහ ගුණාත්මක භාවය ආරක්ෂා කරගැනීම වෙනුවෙන් මෙම පියවර ගත් බවය.
Imperial Sports Group ප්‍රධාන විධායක නිලධාරී තමීම් රහමාන් මුහුණදී ඇති නීතිමය කරුණු සලකාබලා ඉහත තීරණය ගත් බව අදාළ නිවේදනයේ දැක්වෙයි.
වැඩිදුරටත් වාර්තා වෙන්නේ LPL තරගාවලියේ දඹුල්ල තන්ඩර්ස් කණ්ඩායමේ අයිතිය වෙනත් පාර්ශ්වයකට හිමිකර දීමට නියමිත බවය.
එලෙස නව හිමිකාරීත්වය යටතේ දඹුල්ල කණ්ඩායමට LPL තරගාවලිය සඳහා ක්‍රීඩා කිරීමට හැකියාව පවතින බවද වාර්තා විය.
2024 ලංකා ප්‍රිමියර් ලීග් ක්‍රිකට් තරගාවලියේදී තරග පාවාදීම සඳහා යෝජනා කිරීමට උත්සාහ කිරීම සම්බන්ධයෙන් දඹුල්ල තන්ඩර්ස් කණ්ඩායම් හිමිකරු සහ ප්‍රධාන විධායක නිලධාරීයා ලෙස කටයුතු කළ තමීම් රහමාන් මැයි 31 වනදා දක්වා රක්ෂිත බන්ධනාගාරගත කිරීමට කොළඹ මහෙස්ත්‍රාත් අධිකරණය අද (22) නියම කළේය.