වියට්නාම හිටපු සෞඛ්‍ය අමාත්‍ය Nguyen Thanh Long වෙත වසර 18ක සිර දඬුවමක් ලබා දීමට එරට අධිකරණය නියෝග කර තිබේ.
හිටපු සෞඛ්‍ය අමාත්‍යවරයාට එරෙහිව එල්ල වූ චෝදනාව වන්නේ කොරෝනා සමයේ එම පරීක්ෂණ කට්ටල ඉහළ මිලකට මිලදී ගැනීමය.
ඒ අනුව ඔහු අදාළ නිෂ්පාදන සමාගමෙන් ඩොලර් මිලියන 2.25ක අල්ලසක් ලබා ගෙන ඇති බවට අනාවරණය වී තිබේ.
එම ඇන්ටිජන් වංචාවට සම්බන්ධ අදාළ ව්‍යාපාරිකයා සම්බන්ධයන් ද නීතිය ක්‍රියාත්මක කර ඇති අතර ඔහුට වසර 29ක සිර දඬුවමක් නියම කර ඇති බවයි විදෙස් වාර්තා පවසන්නේ.
හිටපු සෞඛ්‍ය අමාත්‍යවරයා සිය වරද අධිකරණයේදී පිළිගෙන ඇති අතර ”මම වැරදියි මට සමාවෙන්න” යනුවෙන් ප්‍රකාශ කර තිබේ.
Nguyen Thanh Long වෛද්‍ය ක්ෂේත්‍රයේ මහාචාර්යවරයෙකුද වෙයි.
ඔහු සෞඛ්‍ය අමාත්‍යවරයා ලෙස 2020 ජුනි මස පත්වන අතර 2022 ජුනි දක්වා සෞඛ්‍ය ඇමතිවරයා ලෙස කටයුතු කර ඇත.
2022 ජුනි 07 වැනිදා එරට මහජන ආරක්ෂක අමාත්‍යාංශයේ විමර්ශන දෙපාර්තමේන්තුව මෙම ඇන්ටිජන් වංචාව සම්බන්ධයෙන් විමර්ශනය ප්‍රකාශයට පත්කර තිබුණි.
Viet A Technology Corp නමැති සමාගම සමඟ එක්ව එම වංචාව සිදුකර ඇත.
ඒ අනුව පසුගිය 12 වැනිදා එම නඩුවේ තීන්දුව ලබා දෙමින් හිටපු සෞඛ්‍ය අමාත්‍යවරයාට උක්ත දඬුවම නියම කර තිබේ.