ජනාධිපතිවරයා සර්වපාක්ෂික සමුළුවේදී 13 වැනි සංශෝධනය ක්‍රියාත්මක කරන්නට යැයි පවසමින් තම දේශපාලන වැඩපිළිවෙළට විපක්ෂයේ මුද්‍රාව තබා ගැනීමට ගත් උත්සාහය පූර්ණ වශයෙන් අසාර්ථක වූ බව නිදහස ජනතා සභාවේ නායක පාර්ලිමේන්තු මන්ත්‍රී ඩලස් අලහප්පෙරුම මහතා පැවසීය.
සර්ව පාක්ෂික සමුළුවක් නොපැවැත්විය යුත්තේ කෙසේදැයි ජනාධිපතිවරයා ලෝකයටම පෙන්නූ බව සඳහන් මන්ත්‍රීවරයා ඉතිහාසය පුරාම සිදු වූ දේශපාලන සූදු කෙළිය දැන්වත් නතර කරන්නැයි ජනාධිපතිවරයාගෙන් ඉල්ලා සිටින බවද ප්‍රකාශ කළේය.
පළාත් පාලන ඡන්දය අනීතික ව කල් දමමින් බලය බෙදීමේ ආකෘතිය වූ පළාත් සභාද අක්‍රිය කිරීමට ප්‍රමුඛ කාර්යභාරයක් ඉටුකළේ රනිල් වික්‍රමසිංහ ජනාධිපතිවරයා බවද ඔහු කීවේය.
අලහප්පෙරුම මහතා මෙසේ පැවසූවේ අද (28) පැවති නිදහස ජනතා සභාවේ ප්‍රවෘත්ති සාකච්ඡාවකදීය.
මෙම සර්ව සර්වපාක්ෂික සමුළුව සැබෑ චිත්‍රය ජනතාව නොදුටු බවත් ජනතාව දුටුවේ සංස්කරණය කරන ලද කොටස් පමණක් බවත් ඩලස් අලහප්පෙරුම මහතා පැවසීය.
නමුත් එහි ඇත්ත කතාව එය නොවන බව පැවසූ මන්ත්‍රීවරයා මෙය අසාර්ථක සමුළුවක් බවද ප්‍රකාශ කළේය.
කුඩාම පරිපාලන ඒකකයට බලය දීමට අකමැති රාජ්‍ය නායකයා, පළාත් සභාවලට දහතුන්වැනි සංශෝධනය අනුව බලය දෙයි ද යන්න ගැන බරපතළ සැකයක් මතුවන බවද ඔහු පැවසුවේය.
ඩලස් අලහප්පෙරුම මහතා මෙසේද කීය.
ආණ්ඩුවේ ක්‍රියාකලාපය වංචනික යි ප්‍රෝඩාකාරී කියන එක මේ වනවිට ඔප්පු වෙලා ඉවරයි .
අපි අවසාන වශයෙන් ආණ්ඩුවෙන් ඉල්ලන්නේ දරුවන්ගේ රටේ ජනතාවගේ අනාගතය සමඟ මේ සෙල්ලම දිගටම කරන්න එපා කියන එකයි.