ජාත්‍යන්තර මූල්‍ය අරමුදලට ශ්‍රී ලංකාව වෙනුවෙන් මූල්‍ය සහතික ලබා දෙමින් මෙරට ණය ප්‍රතිව්‍යුහගත කිරීමේ ක්‍රියාවලියට නිල වශයෙන් සහයෝගය ලබා දුන් ප්‍රථම රට බවට ඉන්දියාව පත් වූ බව විදේශ කටයුතු අමාත්‍ය අලි සබ්රි මහතා අද (20) උදෑසන පැවති ඒකාබද්ධ ප්‍රවෘත්ති සාකච්ඡාවේදී පැවසුවේය.
දෙදින නිල සංචාරයක් සඳහා ශ්‍රී ලංකාවට පැමිණි ඉන්දීය විදේශ කටයුතු අමාත්‍ය ආචාර්ය එස්.ජයිශංකර් මහතා සහ විදේශ කටයුතු අමාත්‍ය අලි සබ්රි මහතා අද (20) උදෑසන ඒකාබද්ධ ප්‍රවෘත්ති සාකච්ඡාවක් පැවැත්වූහ. ජනාධිපති රනිල් වික්‍රමසිංහ මහතාද මෙම ප්‍රවෘත්ති සාකච්ඡාවට සහභාගී විය.
මෙරට ණය හිමියන් ශ්‍රී ලංකාව යථා තත්ත්වයට පත් කිරීම සඳහා ක්‍රියාකාරීව කටයුතු කළ යුතු බව ඉන්දියාවේ මතය බවත් අනෙක් ණය හිමියන් ක්‍රියාමාර්ග ගන්නා තෙක් බලා නොසිටි මෙම අවස්ථාවේ ශ්‍රී ලංකාව වෙනුවෙන් ගතහැකි සුදුසුම ක්‍රියාමාර්ගය ඉන්දියාව ගත් බවත් ආචාර්ය ජයිශංකර් මහතා ප්‍රවෘත්ති සාකච්ඡාවේදී ප්‍රකාශ කළේය.ඒ අනුව ශ්‍රී ලංකාවට ඉදිරියට යාමට මාර්ගය පාදමින් ජාත්‍යන්තර මූල්‍ය අරමුදලට මූල්‍ය සහතික ලබා දුන් බව ජයිශංකර් මහතා පෙන්වා දුන්නේය.