තිලිණි ප්‍රියමාලිට මුදල් දුන් පුද්ගලයන් ලෙස සමාජ මාධ්‍යවල සංසරණය වූ ව්‍යාජ නම් ලයිස්තුව සැකසූ පුද්ගලයන් සම්බන්ධයෙන් පරීක්ෂණයක් පවත්වන ලෙස පිවිතුරු හෙළ උරුමයේ නායක නීතිඥ උදය ගම්මන්පිල මහතා කොළඹ අපරාධ පරීක්ෂණ දෙපාර්තමේන්තුවට අද (9) පැමිණිල්ලක් කළේය.
සමාජ මාධ්‍ය ජාලාවල සංසරණය වූ ව්‍යාජ නම් ලැයිස්තුවේ සිය නම ඇතුළත්ව ඇති බව කී උදය ගම්මන්පිල මහතා එම ලැයිස්තුවට ඇතුළත්ව සිටින දයාසිරි ජයසේකර, චමින්ද විජේසිරි සහ හේෂා විතානගේ යන පාර්ලිමේන්තු මන්ත්‍රීවරු සියලු දෙනා පසුගිය කාලයේ ආණ්ඩුව දැඩිව විවේචනය කළ අය බව ද සදහන් කළේය.
හොරු කියා සම්මත මෙන්ම ඡන්ද කාලයට හොඳට වියදම් කරන කිසිවකුගේ නම් එහි සඳහන්ව නොමැති බවත් දූෂණ චෝදනා ඇති අමාත්‍යවරයකු සහ ප්‍රකට කලාකරුවකු එක්ව එම ලැයිස්තුව සකස් කර ඇති බවට මේ වන විට නිල නොවන ආරංචි මාර්ග ලැබී ඇති බව කී ගම්මන්පිල මහතා මෙයට සම්බන්ධ සියලු තොරතුරු ලිඛිතව පොලිසියට ලබාදුන් බවත් ගම්මන්පිල මහතා කීය.