අතුරු අයවැය යෝජනා අනුව රටේ සමස්ත ලියාපදිංචි වෛද්‍ය නිලධාරීන් 654 න් 350කට පමණ දෙසැම්බර් 31 වන විට විශ්‍රාමයාමට සිදුවන බව රජයේ ලියාපදිංචි වෛද්‍ය නිලධාරී සංගමය පවසයි.
රටේ ග්‍රාමීය ප්‍රදේශයන්හි ප්‍රවාහන, නිල නිවාස, ගොඩනැගිලි ආදී පහසුකම්වලින් තොර රෝහල්වල සේවය කරන වෛද්‍ය නිලධාරීන් රැසක් මෙලෙස එක්වර විශ්‍රාමයෑමෙන් ප්‍රාදේශීය හා ග්‍රාමීය රෝහල් මෙන්ම ප්‍රාථමික සත්කාර සේවා ඒකකවල ප්‍රතිකාර කටයුතු අඩාලවීමේ අවදානමක් මතුව ඇතැයි එම සංගමයේ ප්‍රකාශකයෙක් පැවසීය.
වසර 30ක, 35ක පමණ සේවා පළපුරුද්දක් ඇති මෙම පිරිස මොණරාගල, නුවරඑළිය, බදුල්ල, අනුරාධපුර, කුරුණෑගල, මන්නාරම, පුත්තලම, යාපනය, මුලතිව්, කිලිනොච්චිය, වවුනියාව වැනි දුෂ්කර ප්‍රදේශවල සේවය කරන බවත්, ඔවුන් ඖෂධවේදී, ඖෂධ සංයෝජක, ලිපිකරු ආදී වශයෙන් කිහිපදෙනෙකුගේ කටයුතු කරමින් බහුකාර්ය සේවයක් ඉටුකරන බව ද එම ප්‍රකාශකයා කීවේය.
පවතින ආර්ථික අර්බුදය හමුවේ මෙම පිරිස විශ්‍රාම ගොස් ග්‍රාමීය කුඩා රෝහල්වල කටයුතු අඩාල වුවහොත් ග්‍රාමීය ජනතාව විශාල පීඩාවකට පත්විය හැකි බව ද ඔහු සඳහන් කළේය.
1996 වසරෙන් පසු නැවත බඳවා නොගන්නා සේවයක් බවට පත්කර ඇති ලියාපදිංචි වෛද්‍ය නිලධාරීන්ගේ සේවය මෙම කරුණු සළකා වසර 63ක් දක්වා දීර්ඝ කරන ලෙස ජනාධිපතිවරයා, අගමැතිවරයා, සෞඛ්‍ය අමාත්‍යවරයා ඇතුළු බලධාරීන්ගෙන් ඉල්ලා සිටින බව එම ප්‍රකාශකයා පැවසීය.