සෑම පුද්ගලයන් 10 දෙනෙකුගෙන් 8 දෙනෙකු ශ්‍රී ලංකාවේ ආර්ථික අර්බුදය හමුවේ ඇති වී තිබෙන දුෂ්කරතා වලට මුහුණ දීම සඳහා ආහාර වේල් මග හැරීම,පෝෂ්‍යදායි ආහාර නොගැනීම සහ ආහාර ණයට ගැනීම වැනි ආහාර පදනම් කර ගත් ක්‍රියාමාර්ග වලට යොමුව ඇතැයි ලෝක ආහාර වැඩසටහන පවසයි.
ආර්ථික අර්බුදය ආහාර සුරක්ෂිතතාවයට දිගටම බලපෑම් එල්ල කරන බවත් ඉහළ ආහාර සහ ඉන්ධන මිල මිනිසුන්ගේ ආහාර මිලදී ගැනීමේ හැකියාව තවත් දුර්වල කර ඇති බවත් ලෝක ආහාර වැඩසටහනේ නවතම වාර්තාවේ දැක්වේ. තවද ශ්‍රී ලංකාවේ ජනගහනයෙන් තුනෙන් එකකට (සියයට 37ක්) වඩා වැඩි ප්‍රමාණයක් උග්‍ර ආහාර අනාරක්ෂිතභාවයකින් පෙළෙන බවත් මේ පිළිබඳ ක්‍රියාමාර්ගයක් නොගතහොත් තත්ත්වය තවත් නරක අතට පත්විය හැකි බවත් එම වාර්තාව පෙන්වා දෙයි.
ආහාර සහ ඉන්ධන මිල පිළිබඳ මිනිසුන්ගේ සිත් තුළ ඇති වී තිබෙන පීඩනය සීඝ්‍රයෙන් ඉහළ ගොස් ඇතැයි ලෝක ආහාර වැඩසටහනේ නවතම වාර් තාවේ සඳහන් වේ.
ශ්‍රී ලංකා ජනගහනයෙන් අඩකට ආසන්න ප්‍රමාණයක් (සියයට 43ක්) තම රැකියාවන්ට සහ ජීවනෝපායන්ට එල්ල වී ඇති බාධාවන් පිළිබඳ කණසල්ලෙන් පසුවන බව එම වාර් තාවේ දැක්වේ. එසේම තමන්ට අවශ්‍ය ඖෂධ ලබා ගැනීමට හැකියාව ලැබේදැයි සැලකිලිමත් ජනගහනය ජූලි මස සිට අගෝස්තු මස වන විට සියයට 42 සිට 56 දක්වා වැඩි වී ඇතැයි එම වාර් තාවේ සඳහන් වේ.
ශ්‍රී ලාංකිකයන්ගේ ආහාර වේල අවිනිශ්චිත තත්ත්වයකට පත් ව ඇති බවත් සෑම පවුල් 10 කින් පවුල් 4 ක් ප්‍රමාණවත් පරිදි ආහාර නොගන්නා බවත් රට පුරා ආහාර ද්‍රව්‍යවල මිල ඉහළ මට්ටමක පවතින බැවින් බොහෝ ජනතාව අඩු විවිධත්වයෙන් යුත් ආහාර වේලක් ලබා ගන්නා බවත් එම වාර් තාව පෙන්වා දෙයි.
ශ්‍රී ලාංකිකයන් මිලියන 3.4 කට සහන සැලසීම සඳහා ලෝක ආහාර වැඩසටහනට අවශ්‍ය ඇමෙරිකානු ඩොලර් මිලියන 63 ක මුදලින් සියයට 47 ක ප්‍රමාණයක් මේ දක්වා ආධාර ලෙස ලැබී ඇතැයි ලෝක ආහාර වැඩසටහන ප්‍රකාශ කළේය.