සර්ව පාක්ෂික ආණ්ඩුව හදන්න එන්නැයි බයියොයි,ටොයියොයි හැමෝටම ආරාධනා කරන බව ආණ්ඩු පක්ෂයේ ප්‍රධාන සංවිධායක නාගරික සංවර්ධන සහ නිවාස අමාත්‍ය ප්‍රසන්න රණතුංග මහතා පාර්ලිමේන්තුවේ දී පැවසීය.
සර්ව පාක්ෂික ආණ්ඩුවට උදව් කරන්නේ පොහොට්ටුවට ඡන්දය දුන් ඡන්දදායකයන් බලාපොරොත්තු වුණ දේ ඉටු කරන්නට බවද අමාත්‍යවරයා කීය.
රනිල් වික්‍රමසිංහ යනු විපක්ෂයේ අයට අලුත් කෙනෙක් නොව එතුමලාගේ හදවත ඉන්න නායකයා බව කී ප්‍රසන්න රණතුංග මහතා සර්ව පාක්ෂික ආණ්ඩුවක් නැතිතම් සර්ව පාක්ෂික පාලන ක්‍රමයක් හදා රට පත්ව තිබෙන තත්ත්වයෙන් ගොඩ ගන්න එකතු වෙන්නැයි ඉල්ලා සිටින බවත් ප්‍රසන්න රණතුංග මහතා පැවසීය.
මෙවැනි ආර්ථික අර්බුදකාරී තත්ත්වයක් තිබියදී මාස හයකින් ඡන්දයකට යනවා යැයි කීම විහිළුවක් බව ද අමාත්‍ය ප්‍රසන්න රණතුංග මහතා සඳහන් කළේය.
ජනාධිපතිවරයාගේ ඉදිරි ප්‍රතිපත්ති ප්‍රකාශය පිළිබඳ පාර්ලිමේන්තු විවාදයේදී අදහස් දක්වමින් ප්‍රසන්න රණතුංග මහතා මේ බව කීය.