එම්.එම්. සී ප්‍රදිනාන්දු මහතා විදුලිබල මණ්ඩලයේ සභාපතිවරයා ලෙස සිටියදී කෝප් කමිටුව හමුවේ ඉන්දීය අග්‍රාමාත්‍යවරයා සම්බන්ධ කරමින් කළ ප්‍රකාශයක වචන කිහිපයක් ඉවත් කර ගැනීමට ඔහු කළ ඉල්ලීම එම කමිටුව දීර්ඝ සාකච්ඡාවකින් පසුව අද (23) අනුමත කළේය.
එම ඉල්ලිම අනුමත කරනු ලැබූවේ ලංකා විදුලිබල මණ්ඩලයේ හිටපු සභාපති එම් එම් සී ප්‍රදිනාන්දු මහතා කෝප් කමිටුව හමුවට පසුගිය 10 වෙනිදා පැමිණ කළ ප්‍රකාශයක වචන කිහිපයක් ඉවත් කර ගැනීම සම්බන්ධයෙන් ඉල්ලීම් කරමින් ඔහු විසින් ඉදිරිපත් කෙරුණු ලිපිය පිළිබඳව සාකච්ඡා කිරීම සඳහා ඒ මහතා එම කමිටුව හමුවට අද(23) කැඳවා සාකච්ඡා කළ අවස්ථාවේදීය.
තමාට කෝප් කමිටු රැස්වීමේදී බලපෑමක් සිදුවූ බවට හා අසාධාරණ චෝදනාවක් එල්ල වූ බවට පවසා තිබීම වැරදි ප්‍රකාශයක් බව ප්‍රදිනාන්දු මහතා එහිදී පිළිගත්තේය.
මන්නාරම සහ පුනරින් හි ක්‍රියාත්මක කළ යුතු යැයි සඳහන් වන සූර්ය බල සහ සුළං පුනර්ජනනීය බලශක්ති ව්‍යාපෘතිය ආරම්භ වූයේ කෙසේද යන කාරණය පිළිබඳවද කමිටුව මෙහිදී සොයා බැලුවේය.
මෙම ව්‍යාපෘතිය රජයන් දෙකක් අතර ව්‍යාපෘතියක් ලෙස පිළිගැනීමට එවකට අගමැතිවරයාගේ මාර්ගෝපදේශකත්වයක් තිබුණේ ද යන්න පිළිබඳව කමිටුව මෙහිදී විමසා සිටි අතර ඊට පිළිතුරු දුන් ප්‍රදිනාන්දු මහතා පැවසුවේ රජයේ ඉහළ ඉහළ දේශපාලන අධිකාරිය ලබා දෙන මාර්ගෝපදේශ නිලධාරීන් ලෙස විධානයන් ආකාරයෙන් පිළිගන්නා බවයි.
එය රාජ්‍යයන් දෙකක් අතර එකඟතාවය මතවූ ව්‍යාපෘතියක් ලෙස අවබෝධ කරගත් බවද ඔහු සඳහන් කර ඇත.
විදුලිබල මණ්ඩලයේ හිටපු සභාපතිවරයා කෝප් කමිටුව හමුවේ කළ ප්‍රකාශය ජනාධිපතිවරයා ප්‍රතික්ෂේප කිරීම පිළිබඳවද කමිටුවේ අවධානය යොමුවිය.
කෝප් කමිටුව හමුවේ කළ ප්‍රකාශයේ කොටසක් ඉවත් කර ගැනීම සම්බන්ධයෙන් යැවූ ලිපියේ පිටපතක් ජනාධිපති ලේකම්වරයාට නොයැවූයේ මන්දැයි කෝප් කමිටුව මෙහිදී විමසූ අතර එහිදී අදහස් දැක්වූ ප්‍රදිනාන්දු මහතා පැවසුවේ එය සිතා මතා සිදු නොකළ අතපසු වීමක් බවයි.
මෙම ව්‍යාපෘතියට අදාළ ක්‍රියාදාමය සම්බන්ධයෙන් තවදුරටත් සාකච්ඡා කිරීමටද කෝප් කමිටුව තීරණය කළේය.
විදුලිබල මණ්ඩලයේ හිටපු සභාපතිවරයා කෝප් කමිටුව හමුවේ ප්‍රකාශ කර පසුව ඉල්ලා අස්කරගෙන තිබුණේ බලශක්ති ව්‍යාපෘතිය අදානි සමාගමට ලබා දෙන ලෙස ඉන්දීය අග්‍රාමාත්‍යවරයා බලපෑම් කරන බවට ජනාධිපතිවරයා තමාට ප්‍රකාශ කළේ යැයි ය න ප්‍රකාශයයි.