පාසල්වල පළමු ශ්‍රේණියට ළමුන් ඇතුළත් කිරීම ලබන 2023 වසරේ සිට සංශෝධිත නව චක්‍රලේඛයේ අඩංගු විධිවිධාන අනුව සිදුකිරීමට අමාත්‍ය මණ්ඩල අනුමැතිය හිමිව තිබේ.
පාසල්වල පළමුවන ශේණියට ළමුන් ඇතුළත් කිරීම සඳහා මීට පෙර නිකුත් කරන ලද චක්‍රලේඛයන් ක්‍රියාත්මක කිරීමේදී පැන නැඟුන ගැටලු හේතුවෙන් අධ්‍යාපන අමාත්‍යාංශය සංශෝධිත නව චක්‍රලේඛයක් පිළියෙල කර ඇත.
පැවති චක්‍රලේඛයේ ගැටලු සම්බන්ධයෙන් පිළිබඳව විදුහල්පතිවරුන්, චක්‍රලේඛ සංශෝධන කමිටුව, අමාත්‍යාංශයේ විමර්ශන අංශය, අල්ලස් හෝ දූෂණ චෝදනා විමර්ශන කොමිෂන් සභාව හා මැතිවරණ කොමිෂන් සභාව ඇතුළු විවිධ පාර්ශව විසින් ඉදිරිපත් කරන ලද කරුණු මෙන්ම ඒ පිළිබඳව වූ අධිකරණ තීන්දු ද සැලකිල්ලට ගනිමින් සංශෝධිත නව චක්‍රලේඛය සකස් කර ඇති බව අධ්‍යාපන අමාත්‍යාංශය පවසයි.
අධ්‍යාපන අමාත්‍ය සුසිල් ප්‍රේමජයන්ත මහතා ඉදිරිපත් කළ යෝජනාවකට මෙලෙස අමාත්‍ය මණ්ඩල අනුමැතිය හිමිව තිබේ.