ජනතා විමුක්ති පෙරමුණේ නායක අනුර කුමාර දිසානායක මහතා පසුගිය දිනවල ඇති වූ ප්‍රචණ්ඩ ක්‍රියා සම්බන්ධයෙන් අදහස් දැක්වූ අවස්ථාවේදී ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රීවරුන් රැසක් ඔහුගේ කතාවට දිගින් දිගටම බාධා එල්ල කිරීම නිසා පාර්ලිමේන්තුවේ දැඩි නොසන්සුන් තත්වයක් අද (18) පස්වරුවේ ඇතිවිය.
ශ්‍රී ලංකා පොදුජන පෙරමුණේ ඇතැම් මන්ත්‍රීවරු ” මිනී මරුවා මිනීමරුවා. ඔයා තමයි ඔක්කොම කළේ” යනුවෙන් කෑගසනු දැකගත හැකිවිය .
මේ අවස්ථාවේදී අදහස් දැක්වූ අනුර කුමාර දිසානායක මහතා ජනතා විමුක්ති පෙරමුණ මෙවැනි ආකාරයේ තර්ජනවලට බියවන පක්ෂයක් නොවන බව ප්‍රකාශ කළේය.
පසුගිය දිනවල ඇතිවූ ප්‍රචණ්ඩ ක්‍රියා වලට ජනතා විමුක්ති පෙරමුණේ සාමාජිකයන් සම්බන්ධ නම් ඒ සම්බන්ධයෙන් පවත්වන ඕනෑම පරීක්ෂණයකට මුහුණදීමට සූදානම් බවද අනුර දිසානායක මහතා පැවසූවේය.
මෙහිදී අදහස් දැක්වූ හිටපු රාජ්‍ය අමාත්‍ය අරුන්දික ප්‍රනාන්දු මහතා පැවසුවේ පසුගිය දිනවල ඇතිවූ ප්‍රචණ්ඩ ක්‍රියා සම්බන්ධයෙන් අත්අඩංගුවට ගනු ලැබූ හාරසිය පනස් දෙනා ගෙන් එකසිය පනස් දෙනකුම ජනතා විමුක්ති පෙරමුණේ සාමාජිකයන් බව පොලිස්පතිවරයා දන්වා ඇති බවයි.
මෙහිදී ඊට ප්‍රතිචාර දැක්වූ අනුර දිසානායක මහතා එසේනම් ඒ අයට ජනතා විමුක්ති පෙරමුණේ සාමාජිකත්වය ලබාදී ඇත්තේ පොලිස්පතිවරයා විය හැකි යැයි ප්‍රකාශ කළේය.
තමාගේ නිවෙසද 1988දී ගිනිගෙන විනාශවූ බව ඔහු සඳහන් කළේය.
හිටපු රාජ්‍ය අමාත්‍ය ශාන්ත බණ්ඩාර මහතා මෙහිදී පැවසුවේ තමාගේ නිවෙසට ගිනි තැබීමට පැමිණි පිරිසේ ජනතා විමුක්ති පෙරමුණේ ප්‍රබලයකුද සිටි බවයි.
මේ අවස්ථාවේදී ශ්‍රී ලංකා පොදුජන පෙරමුණේ මන්ත්‍රීවරු අනුර කුමාර දිසානායක මහතාට විවිධ චෝදනා කරමින් කෑ ගසන්නට වූහ.
සියලු ප්‍රශ්න ඇතිවුණේ තමන්ගෙ පාඩුවෙ අරගල කරපු පිරිසට මැරියන් යොදා පහරදීම නිසා යැයිද එම සිද්ධියෙන් ජනතාව කුපිත වූවේ යැයිද අනුර කුමාර දිසානායක මහතා වැඩිදුරටත් පැවසීය.