ප්‍රචණ්ඩ ක්‍රියා හේතුවෙන් උන්හිටිතැන් අහිමිවු මැතිඇමතිවරුන්ට නාගරික සංවර්ධන අධිකාරියේ තලවතුගොඩ නිවාස සංකීර්ණයෙන් නිවාස තාවකාලිකව ලබා දෙන ලෙස ජනාධිපති ගෝඨාභය රාජපක්ෂ මහතා නිලධාරීන්ට උපදෙස්දී ඇත.
මැති ඇමැතිවරුන් 55 දෙනකුට අයත් නිවාස ප්‍රචණ්ඩකාරීන්ගේ ප්‍රහාර වලින් සහ ගිනි තැබීම්වලින් පසුගිය දිනවල විනාශයට පත්විය.
මෙයට අමතරව සෑම මන්ත්‍රීවරයෙකුටම අමතර ආරක්ෂකයන් හයදෙනකු ලබාදීමටද තීරණය කර ඇත.
ජනාධිපති ගෝඨාභය රාජපක්ෂ මහතා සහ ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රීවරුන් අතර ජනපති මන්දිරයේදී අද පෙරවරුවේ පැවති හමුවේදී මේ බව අනාවරණය කෙරිණ.
රටපුරා පසුගියදා ඇතිවූ ගෙවල් ගිනි තැබීම හා දේපල විනාශ කිරීම් පාලනය කිරීම සදහා ක්‍රියාත්මක නොවූ බව කියමින් ශ්‍රී ලංකා පොදුජන පෙරමුණේ මන්ත්‍රීවරුන් පොලිසියට දැඩි විවේචනයක් එල්ල කර ඇත.
එම රැස්වීමට පොලිස්පතිවරයාද කැඳවා ඇති අතර පොලිස්පතිවරයා ඉදිරියේද මන්ත්‍රීවරුන් මෙම විවේචනය එල්ල කිරීමද විශේෂත්වයකි.
ගෙවල් ගිනිතැබීම් හා වාහන වලට හානි කිරීම් සිදුවෙද්දී එය පාලනය කිරීමට පොලිසිය ප්‍රමාණවත් ක්‍රියාමාර්ගයක් නොගත් බවද ඔවුන් පෙන්වා දී ඇත.