රට මුහුණ දී සිටින මේ තීරණාත්මක අවස්ථාවේදී විපක්ෂයේ සියලුම දෙනා භේද පසෙකලා එකාවෙන් පෙළගැසී මාතෘ භූමිය සහ ජනතාව වෙනුවෙන් කැපවිය යුතු බවත් රට මුහුණදී සිටින දේශපාලන සහ ආර්ථික අර්බුදයට විසඳුම් සෙවිය හැක්කේ විපක්ෂයේ සියලු දෙනා එකතු වීමෙන් පමණක් බවත් කොළඹ නගරාධිපතිනී රෝසි සේනානායක මහත්මිය නිවේදනයක් නිකුත් කරමින් පවසන්නීය.
විපක්ෂයේ සියලු දෙනා පොදු සම්මුතියක් වෙනුවෙන් විශ්වාසන් අත්වැල් බැඳගෙන ශක්තිමත් ප්‍රවේශයක් ලබාගෙන ඉදිරියට යනවාද?
නැතිනම් බියෙන් මුළුගැන්වී තැන් තැන්වලට වී පලා යනවාද? යන්න විපක්ෂයේ සියලු දෙනා දැන් තීරණය කළ යුතු බවත් විපක්ෂයේ කාර්යභාරය ඉටු කරනවා වෙනුවට තවදුරටත් තම තමන්ගේ දේශපාලන කදවුර තුළ සිට කටයුතු කරනවාද යන්න තීරණය කළ යුතු බවත් කොළඹ නගරාධිපතිනිය පවසන්නීය.
එක්සත් ජාතික පක්ෂය සහ සමගි ජන බලවේගය පක්ෂ දෙකක් නොව එකම පවුලකින් වෙන්වී ගිය සොයුරු සොයුරියන්ගෙන් සමන්විත දේශපාලන බලවේගයක් යයි එම පක්ෂවල නායකයන් මතකයේ තබා ගත යුතු බව කීය රෝසි සේනානායක මහත්මිය අවස්ථාවාදී සහ අදූරදර්ශී දේශපාලකයන් රටේ වර්තමානය පමණක් නොව නූපන් අනාගත පරපුරද ඛේදජනක තත්ත්වයකට ඇද දමා ඇති මෙවැනි මොහොතක විපක්ෂයට අතහැරිය නොහැකි වගකීම නොපිරිහෙලා ඉටු කළ යුතු බවත්ය.
ඔබ මහජන නියෝජිතයන් ලෙස පත්කළ ජනතාවට බඩගින්නේ මිය යාමට ඉඩ දෙනවද නැත්නම් ඔවුන් වෙනුවෙන් සාමූහිකව කැප වෙනවා ද යන්න තීරණය විපක්ෂය ගතයුතු බවත් ඉදිරියේදී ඩොලර් බිලියන 7ක ණය ගෙවීමට තිබීම හේතුවෙන් ශ්‍රී ලංකාව තවත් පීඩාවට පත්වීම වැළැක්විය නොහැකි බවත් කොළඹ නගරාධිපති රෝසි සේනානායක මහත්මිය අවධාරණය කරන්නීය.