ඇමෙරිකා එක්සත් ජනපද ඩොලරයට සාපේක්ෂව ශ්‍රී ලංකා රුපියල 270ක අගයක් දක්වා අද (15) පහළ වැටිණි.
ඇමෙරිකානු එක්සත් ජනපද ඩොලරයට සාපේක්ෂව රුපියල මෙතරම් අගයට පහළ වැටුණු මෙරට ඉතිහාසයේ පළමු අවස්ථාව මෙය වේ.
ශ්‍රී ලංකා මහ බැංකුව අද (15) නිකුත් කළ දෛනික විදේශ විනිමය අනුපාතවලට අනුව ඇමෙරිකා එක්සත් ජනපද ඩොලරයක ගැනුම් අනුපාතය රුපියල් 259.76 ක් වූ අතර විකුණුම් අනුපාතය රුපියල් 269.99ක් විය.
කෙසේ නමුත් මෙරට ප්‍රධාන පෙළේ වාණිජ බැංකු නිකුත් කළ දෛනික විදේශ විනිමය අනුපාතවලට අනුව ඇමෙරිකානු ඩොලරයක විකුණුම් අනුපාතය/අගය රුපියල් 275ක් ලෙස දැක්විණි.
මේ අතර මේ වසරේ ජනවාරි 1 වැනිදා සිට මාර්තු 11 වැනිදා දක්වා කාලයේ දී ඇමෙරිකා එක්සත් ජනපද ඩොලරයට සාපේක්ෂව ශ්‍රී ලංකා රුපියල සියයට 20.5ක අගයකින් අවප්‍රමාණය වී ඇත.
ශ්‍රී ලංකා මහ බැංකුව සතිපතා නිකුත් කරන ආර්ථික දත්තවලට අනුව පෙබරවාරි මාසය අවසානයේ දී ශ්‍රී ලංකාව සතුව ඇති නිල දළ සංචිත ප්‍රමාණය ඇමෙරිකානු ඩොලර් මිලියන 2,313.8 (බිලියන 2.31) කි.
එයින් විදේශ විනිමය ලෙස පවතින සංචිත ප්‍රමාණය ඇමෙරිකානු ඩොලර් මිලියන 2,025.1ක් වන අතර රත්තරං සංචිතය ඇමෙරිකානු ඩොලර් මිලියන 97.7කි.