ශ්‍රී ලංකා සංචාරක මණ්ඩලයේ මූලිකත්වයෙන් සකස් කරමින් තිබෙන නව සංචාරක පනතට ශ්‍රී ලංකා සංචාරක ක්ෂේත්‍රයේ සියලුම ප්‍රධානම සංගම් විරුද්ධ බව සංචාරක උපදේශක සභාවේ සභාපති හිරාන් කුරේ මහතා අද (10) පැවසීය.
ශ්‍රී ලංකාව විදේශ විනියම හිඟයකින් දැඩි පීඩාවට පත්ව සිටින මේ මොහොතේ කළ යුත්තේ නව පනත් ගෙන ඒම නොවන බව කී හිරාන් කුරේ මහතා බලධාරීන්ගේ අවධානය මේ අවස්ථාවේදී වැඩි වැඩියෙන් සංචාරයන් රටට ගෙන ඒමට යෙවිය යුතු බව ද සඳහන් කළේය.
සංචාරක මණ්ඩලයේ සභාපතිනිය සංචාරක කර්මාන්තයේ නියැලී සිටින පිරිස මඟ හරිමින් අත්තෝනෝමතිකව කටයුතු කමින් සිටින බවත් මෙම තත්වයට සංචාරක අමාත්‍යවරයා මැදිහත්විය යුතු බවත් කුරේ මහතා කීය.
රට ඩොලර් ප්‍රශ්නයෙන් මුදාගැනීමට ශ්‍රී ලංකාවට වැඩිම ඩොලර් ප්‍රමාණයක් උපයන ක්ෂේත්‍රයක් වන සංචාරක කර්මාන්ත ප්‍රවර්ධනය සඳහා කටයුතු කිරීම මිස කර්මාන්තයේ රැදී සිටින කර්මාන්තකරුවන් අපහසුතාවට පත් නොකළ යුතු බව කී හිරාන් කුරේ මහතා පැවසුවේ සංචාරක කර්මාන්තකරුවන්ට ව්‍යාපාරයට අවධානය සහ කැපවීමට ඇති කාලය නව පනත් වැනි දේවලින් විනාශ කිරීම නොකළ යුතු බවත්ය.
සංචාරක අමාත්‍යවරයාගේ ඉල්ලීම පරිදි නව පනතක් සකස් කිරීමට සංචාරක ක්ෂේත්‍රයේ සිටින කර්මාන්තකරුන් ලෙස යෝජනා ලිඛිතව ලබාදුන්න ද එම යෝජනා විසිකර දමා සංචාරක මණ්ඩලයේ සභාපතිනිය ඇතුළු පිරිසක් නව පනතක් සකස් කරමින් සිටින බවත් එම පනතට සංචාරක සේවා සපයන ප්‍රධානතම සංගම් විරුද්ධ බවත් එම විරෝධතාව සංචාරක අමාත්‍යවරයාට සහ එම අමාත්‍යංශයේ ලේකම්වරයාට ලිඛිතව දැනුම් දුන් බවත් සංචාරක උපදේශක සභාවේ සභාපති හිරාන් කුරේ මහතා කීය.
සියලු දෙනාගේම සහයෝගය ලබාගෙන සකස් කරන නව සංචාරක පනතකට සහයෝගය දක්වන බවත් ‘කොවිඩ්’ වසංගය ඇතිවීමට පෙර කිසිඳු බාධාවක් නොතිබුණු හොඳ වසරකදී සංචාරක කර්මාන්තයෙන් රටට ඩොලර් බිලියන 5 ත් 6 ත් අතර අති විශාල ආදායමක් ලැබුණු බවත් හිරාන් කුරේ මහතා වැඩි දුරටත් ස`ඳහන් කළේය.
නව සංචාරක පනත පිළිබඳව දැනුවත් කිරීම සඳහා කොළඹ රමාඩා හෝටලදී අද (10) පෙරවරුවේ පැවැති විශේෂ මාධ්‍ය හමුවේදී හිරාන් කුරේ මහතා එසේ පැවසීය.
මෙම මාධ්‍ය හමුවට සහභාගි වූ සංචාරකයන් ගෙන්වන්නන්ගේ සංගමයේ සභාපති තිලක් වීරසිංහ මහතා පැවසුවේ රට තුළ වර්තමානයේ පවතින ඉන්ධන, ගෑස් ආදි අත්‍යවශ්‍ය ද්‍රව්‍යවල හිඟය සංචාරක කර්මාන්තයට දැඩි බලපෑමක් කර ඇති බවත් රජය සංචාරක කර්මාන්තයෙන් ඩොලර් ඉපයීමට බලාපොරොත්තු වන්නේ නම් එම බාධා හැකි ඉක්මණින් ඉවත්කිරීමට කටයුතු කළ යුතු බවත්ය.
බලධාරීන් මේ අවස්ථාවේදී කළ යුත්තේ කර්මාන්තයේ සිටින පෞද්ගලික අංශය වෙනත් අංශයකට යොමු කිරීම නෙවන බවත් සංචාරක කර්මාන්තය තුළ බේදයන් නිර්මාණය නොකර සංචාරක මණ්ඩලය තුළ ඇති දේශීය සංචංරක අංශය මගින් කර්මාන්තය තව දුරටත් දියුණු කිරීමට කටයුතු කළ යුතු බවත් තිලක් වීරසිංහ මහතා සඳහන් කළේය.
සංචාරක කර්මාන්තයේ ධාරිතාවයෙන් සියයට 99 ක්ම පෞද්ගලික අංශය ආයෝජනයන් බවත් සංචාරක මණ්ඩලයේ ක්‍රියාත්මක වන කමිටු හතරේම වර්තමානයේ සභාපතිවරයා ලෙස එක පුද්ගලයෙක් කටයුතු කිරීම නිසා කර්මාන්ත දියුණු කිරීම වඩාත් පහසු යැයි තමන් සිතන බවත් සංචාරක හෝටල් හිමියන්ගේ සංගමයේ හිටපු සභාපති අනුර ලොකුහෙට්ටි මහතා එහිදී පැවසීය.
සංචාරක හෝටල් හිමියන්ගේ සංගමයේ සභාපති ශාන්ති කුමාර් මහතා ඇතුළු සංචාරක කර්මාන්තයට සම්බන්ධ ප්‍රධාන සංගම් හත නියෝජනය කරමින් නියෝජිතයෝ විශාල පිරිසක් මෙම අවස්ථාවට සහභාගි වූහ.