රුසියාව යුක්රේනයට ‘රික්තක’ බෝම්බවලින් පහර දෙන බව ඇමෙරිකාවේ යුක්රේන තානාපති ඔක්සානා මර්කරෝවා පවසා ඇත. තානාපතිවරයා මෙසේ පවසා ඇත්තේ යුක්රේනයෙන් ලැබෙන හමුදා තොරතුරු පාදක කර ගනිමිනි.
‘රික්තක’ බෝම්බ, ‘තර්මෝබැරික්’ එසේත් නැතිනම් ‘උෂ්ණත්ව බෝම්බ’ ලෙස ද හැඳින්වෙයි. මේවා පුපුරා යන්නේ අවට ඇති ඔක්සිජන් උරා ගනිමිනි. එසේ උරා ගනිද්දී රික්තයක් නිර්මාණය වෙයි. රික්තක බෝම්බ ලෙස හැඳින්වෙන්නේ ඒ නිසාය. මේවා සම්ප්‍රදායික අවි ආයුධවලට වඩා ප්‍රබලය.
ජිනීවා සම්මුතියට අනුව, මෙවැනි රික්තක බෝම්බ යුද සංග්‍රාමවලදී භාවිතයට ගැනීම තහනම් බව ද පැවැසෙයි. රුසියන් හමුදා යුක්රේනය ආක්‍රමණය ආරම්භ කළේ පසුගිය 24 වැනිදාය.
අද (1) රුසියානු යුක්රේන යුද්ධයේ හය වැනි දිනයයි. මේ වනතුරු රුසියන් හමුදා ප්‍රහාර සඳහා භාවිතයට ගත්තේ සාම්ප්‍රදායික අවි පමණි. කෙසේ නමුත් තමන් ‘රික්තක‘ බෝම්බ යොදා ගනිමින් පහර දෙන බව රුසියාව තහවුරු කර නැත.