අරලියගහ මන්දිරයේ අද පැවති ආණ්ඩු පක්ෂ මන්ත්‍රී කණ්ඩායම් රැස්වීමේදී බලශක්ති අමාත්‍ය උදය ගම්මන්පිල මහතා සහ ජයන්ත කැටගොඩ මන්ත්‍රීවරයා ඇතුළු පොදුජන පෙරමුණේ මැති ඇමතිවරුන් පිරිසක් අතර උණුසුම් මත ගැටුමක් ඇති වූ බව වාර්තා වේ.
රට තුළ මතුව ඇති ආර්ථික අර්බුදයට හේතුව කොවිඩ් වසංගතය පමණක් නොවන බවට බලශක්ති අමාත්‍ය උදය ගම්මන්පිල මහතා කළැයි කියන ප්‍රකාශයක් සම්බන්ධයෙන් කැටගොඩ මන්ත්‍රීවරයා ආණ්ඩු පක්ෂරැස්වීමේ දී විරෝධය පළ කිරීමත් සමග මෙම මත ගැටුම හටගෙන ඇතැයි රජයේ ආරංචි මාර්ග සඳහන් කරයි.
කැටගොඩ මන්ත්‍රීවරයාට අමතරව රෝහිත අබේගුණවර්ධන ,එස් .ඒ .ඩ් ජගත් කුමාර ,තිස්ස කුට්ටිආරච්චි යන මන්ත්‍රීවරුන් ඇතුළු පොදුජන පෙරමුණේ මන්ත්‍රීවරුන් කිහිප දෙනකු ද මේ සම්බන්ධයෙන් විරෝධය පළ කර ඇතැයි දැනගන්නට තිබේ.
එහිදී අදහස් දක්වා ඇති ගම්මන්පිල මහතා සඳහන් කර ඇත්තේ,තමන් ප්‍රකාශ කළේ කොවිඩ් අර්බුදයට අමතරව ,ශ්‍රී ලංකාව දිගින් දිගටම ලබා ගත් ණය ගෙවන්නට තිබීම ද ආර්ථික අර්බුදයට හේතුවක් වී ඇතැයි ප්‍රකාශ කළ බවය.
වෙනත් අදහසක් එමගින් ඉස්මතු කිරීමට තමා උත්සාහ නොකළ බවද ගම්මන්පිල මහතා ප්‍රකාශ කර ඇත.
එහිදී අදහස් දක්වා ඇති පොදුජන පෙරමුණේ මන්ත්‍රීවරුන් පිරිසක් පෙන්වා දී ඇත්තේ ගම්මන්පිල මහතාගේ ප්‍රකාශයෙන් ආණ්ඩුව අපහසුතාවට පත්වන බවය.
ජනතාව හමුවට ගොස් මෙවැනි ප්‍රකාශ කරන මැති ඇමතිවරුන් සම්බන්ධයෙන් ආණ්ඩුව යම් පියවරක් ගත යුතු බවද ඔවුන් එහිදී ප්‍රකාශ කර ඇතැයි දැනගන්නට තිබේ.
ආණ්ඩු පක්ෂ රැස්වීම ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් පැවැති අතර ,ඊට අග්‍රාමාත්‍ය මහින්ද රාජපක්ෂ මහතාද මැති ඇමැතිවරු ද සහභාගි වූහ.