සමකාලීන සියලු බලවේග සමඟ දැය දිනවන වැඩපිළිවෙලකට අවතීර්ණවීමට සූදානමින් සිටින්නැයි සියලු පාක්ෂිකයින්ගෙන් ඉල්ලා සිටින බව ශ්‍රී ලංකා නිදහස් පක්ෂයේ සභාපති, හිටපු ජනාධිපති මෛත්‍රීපාල සිරිසේන මහතා එම පක්ෂයේ 70 වැනි සංවත්සර වැඩසටහන අමතමින් අද (2) පැවසීය.
තාවකාලික පසුබෑම් යනු ඕනෑම දේශපාලන පක්ෂයකට පොදු කරුණක් බවද මෛත්‍රීපාල සිරිසේන මහතා ප්‍රකාශ කළේය
ශ්‍රී ලංකාව එල්.ටී.ටී.ඊ ත්‍රස්තවාදයෙන් අත් මිදී වසර 10 කට පසු ඉස්ලාම් අන්තවාදී ත්‍රස්තවාදීන්ගේ බිහිසුණු සිදුවීමක් සිදුවූ බව කී හිටපු ජනාධිපතිවරයා එම ප්‍රහාරය සම්බන්ධයෙන් හා ඉන්පසු උද්ගත වූ දේශපාලන දාම්‍යයන් පිළිබඳව ශ්‍රී ලංකා නිදහස් පක්ෂය හොඳින් දැනුවත් බව සඳහන් කළේය.
අභියෝග, අවලාද, මඩගැසීම්, නින්දා, අපහාස යනු අෂ්ඨ ලෝක ධර්මය බවද හිටපු ජනාධිපතිවරයා පැවසීය.
කොවිඩ් වසංගත තත්වය හේතුවෙන් එම පක්ෂ සංවත්සර සැමරුම සූම් තාක්ෂණය ඔස්සේ පැවැත්විණි.
පක්ෂ ජ්‍යෙෂඨ උප සභාපතිවරුන් වන ඇමති නිමල් සිරිපාල ද සිල්වා, ඇමති මහින්ද අමරවීර, මහාචාර්‍ය රෝහණ ලක්ෂ්මන් පියදාස, පක්ෂ මහලේකම්, රාජ්‍ය අමාත්‍ය දයාසිරි ජයසේකර, පාර්ලිමේන්‍තු මන්ත්‍රී අංගජන් රාමනාදන්, මහාචාර්‍ය ධම්ම දිසානායක යන මහත්වරුන්ද මෙහිදී අදහස් දැක්වූහ.