බත්තරමුල්ලේ ඉකුත්දා පැවැති ගුරු උද්ඝෝෂණයට සහභාගී වූ ගුරු සංගම් නියෝජිතයන් පොලිසිය මැදිහත්ව නිරෝධනයට යොමුකිරීම සම්බන්ධයෙන් ආණ්ඩු පක්ෂ රැස්වීමේදී මහජන ආරක්ෂක ඇමති රියර් අද්මිරාල් සරත් වීරසේකර මහතා සහ කොළඹ දිස්ත්‍රික් පාර්ලිමේන්තු මන්ත්‍රී එස් ඒ ඩි.ජගත් කුමාර මහතා අතර මත ගැටුමක් ඇති වූ බව වාර්තා වේ.
මෙම උද්ඝෝෂණයට පොලිසිය මැදිහත් වු ආකාරය වැරදි බවට ජගත් කුමාර මන්ත්‍රීවරයා මීට පෙර කර ඇති ප්‍රකාශයක් සම්බන්ධයෙන් විරෝධය පළකරමින් සරත් වීරසේකර ඇමතිවරයා ආණ්ඩු පක්ෂ රැස්වීමේදී අදහස් දක්වා ඇත .
මන්ත්‍රීවරයාගේ එම ප්‍රකාශය පොලිසිය අධෛර්යයට පත් කිරීමක් බැවින්, තමා එය හෙළා දකින බව සරත් වීරසේකර මහතා එම රැස්වීමේදී ප්‍රකාශ කර ඇත .
පොලිසිය උද්ඝෝෂණය මැඩපැවැත්වීමට මැදිහත් වුණේ සෞඛ්‍ය සේවා අධ්‍යක්ෂ ජනරාල්වරයාගේ ඉල්ලීමක් මත බව ද සරත් වීරසේකර මහතා එහිදී පවසා ඇත .
සරත් වීරසේකර මහතාගේ චෝදනාවට පිළිතුරු දී ඇති ජගත් කුමාර මහතා පොලිසිය එම උද්ඝෝෂණයට මැදිහත් වූ ආකාරය වැරදි බව තමා අදත් ප්‍රකාශ කරන බව සඳහන් කර ඇත .
පොලිසිය අනවශ්‍ය ආකාරයට ආණ්ඩුව රැකීමට යාමෙන් ආණ්ඩුවද අපහසුතාවට පත්වන බව ඔහු සඳහන් කර ඇත.පසුගිය යහපාලන ආණ්ඩුව සමයේ ද පොලිසිය අනවශ්‍ය ආකාරයට ආණ්ඩුව රැකීමට යාම නිසා අවසානයේ ආණ්ඩුවත් පොලිසියත් දෙකම විනාශ වූ බව මන්ත්‍රීවරයා පවසා ඇත .
යහපාලන ආණ්ඩුව සමයේ උද්ඝෝෂණ පන්සියයක් පමණ සිදු වූ බව සඳහන් කර ඇති මන්ත්‍රීවරයා වෘත්තිය සමිති නායකයකු ලෙස තමා ද ඉන් සියයකට පමණ සහභාගි වූ බව සඳහන් කර ඇත .
ප්‍රජාතන්ත්‍රවාදී වෘත්තීය අරගලවලට ඉඩක් තිබිය යුතු බව සඳහන් කර ඇති මන්ත්‍රීවරයා වෘත්තීය සමිති නායකයකු ලෙස තමන්ට අඩුපාඩු පෙන්වා දීමට නොහැකි නම් මන්ත්‍රීධූරයේ සිටිමෙි තේරුමක් නැති බවද සඳහන් කර ඇත .
අගමැති මහින්ද රාජපක්ෂ මහතා මැදිහත්ව දෙදෙනා අතර මත ගැටුම දුරදිග යාම වළක්වා ඇතැයි වාර්තා වේ .