ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවන් තිදෙනකු සහ අධිකරණ සේවා කොමිෂන් සභාවේ සාමාජිකයකු පත් කිරීමට පාර්ලිමේන්තු සභාවේ අනුමැතිය ලැබුණු බව පාර්ලිමේන්තු මහලේකම් ධම්මික දසනායක මහතා පවසයි.
අභියාචනාධිකරණයේ සභාපති විනිසුරු අර්ජුන ඔබේසේකර මහතා ශ්‍රේෂ්ඨාධිකරණ විනිසුරුවරයකු ලෙස පත් කිරීමටද අභියාචනාධිකරණයේ විනිසුරු කේ පී ප්‍රනාන්දු මහතා එම අධිකරණයේ සභාපති ලෙස පත් කිරීමටද අභියාචනාධිකරණ විනිසුරු ධුරයේ පුරප්පාඩුව සඳහා මහාධිකරණ විනිසුරු සසි මහේන්ද්‍රන් මහතා පත් කිරීමටද අධිකරණ සේවා කොමිෂන් සභාවේ සාමාජික ධූරයේ පුරප්පාඩුව සඳහා ශ්‍රේෂ්ඨාධිකරණ විනිසුරු එල්.ටී.බී දෙහිදෙණිය මහතා පත් කිරීමටද පාර්ලිමේන්තු සභාවේ අනුමැතිය මෙසේ ලැබී ඇත .
අධිකරණ සේවා කොමිෂන් සභාවේ සාමාජික ධූරයේ එම පුරප්පාඩුව ඇති වූයේ එහි සාමාජිකයකු ලෙස කටයුතු කළ හිටපු ශ්‍රේෂ්ඨාධිකරණ විනිසුරු සිසිර ද ආබෲ මහතා විශ්‍රාම ගැනීම නිසාය .
අධිකරණ විනිසුරුවන් ලෙස සහ අධිකරණ සේවා කොමිෂන් සභාවේ සාමාජික ධුරයට පත්කිරීමට මෙම නාම යෝජනා පාර්ලිමේන්තු සභාවට ඉදිරිපත් කරනු ලැබුවේ ජනාධිපති ගෝඨාභය රාජපක්ෂ මහතා විසිනි .