කොවිඩ් වෛරසය ආසාදනය වීමෙන් මේ වන විට පොලිස් නිලධාරීන් 8 දෙනකු මිය ගොස් ඇතැයි පොලිස් ආරංචි මාර්ග සඳහන් කරයි.
මෙම මරණ අතරෙන් හය දෙනකු ම මරණයට පත් වී ඇත්තේ ඉකුත් මැයි මස 12 වැනිදා ඉන් පසුව එනම්, කොරෝනා තුන්වෙනි රැල්ලෙන් බවද එම ආරංචි මාර්ග පවසයි.
කොරෝනා පළමු සහ දෙවැනි රැල්ලෙන් පොලිස් නිලධාරින් එක් අයකු බැගින් ද, තෙවැනි රැල්ලෙන් පොලිස් නිලධාරීන් හයදෙනෙකු ද වශයෙන් පොලිස් දෙපාර්තමේන්තුවේ නිලධාරීන් 8 දෙනෙකු මේ වන විට කොරෝනා ආසාදනයෙන් මිය ගොස් ඇතැයි එම ආරංචි සඳහන් කරයි.
මිය ගිය පොලිස් නිලධාරීන් තිදෙනෙකු කුරුණෑගල පොලිසියේ සේවය කළ අයවලුන් වන අතර, මියගිය අනෙක් අය මොනරාගල , බණ්ඩාරවෙල, බදුල්ල, තෙල්දෙණිය සහ හලාවත යන පොලිසිවල සේවය කල බවද පැවසෙයි.
මෙම මරණ අතර උප පොලිස් පරීක්ෂකවරු සිවුදෙනකු පොලිස් සැරයන්වරුන් දෙදෙනෙකු සහ පොලිස් කොස්තාපල්වරුන් දෙදෙනෙකු ද වෙති.
කොරෝනා වෛරසය ආසාදනය වීමෙන් මියගිය පළමු පොලිස් නිලධාරියා වූයේ මොනරාගල පොලිසියේ සේවය කළ උප පොලිස් පරීක්ෂක පී එන් අන්දිරිස් අප්පු මහතා වන අතර ඔහු ඉකුත් පෙබරවාරි මස 6 වැනිදා මරණයට පත්විය.
