ශ්‍රී ලංකා ක්‍රිකට් කණ්ඩායම බටහිර ඉන්දීය කොදෙව් ක්‍රිකට් තරගාවලිය සඳහා අද (23) අලුයම 3.35 ට කටාර් ගුවන් සේවයේ QR – 669 දරන ගුවන් යානයෙන් පිටත්ව ගොස් ඇත.
කටාර් රාජ්‍යයේ දෝහා වෙත පැමිණීමෙන් පසු, ශ්‍රී ලංකා ක්‍රිකට් කණ්ඩායම එතැන් සිට වෙනත් ගුවන් යානයකින් බටහිර ඉන්දීය කොදෙව් දූපත් වෙත ළඟාවීමට නියමිත ය.
බටහිර ඉන්දීය කොදෙව් කණ්ඩායමට එරෙහිව පැවැත්වෙන තරග 3කින් සමන්විත විස්සයි 20 ක්‍රිකට් තරගාවලියට සහභාගීවන ශ්‍රී ලංකා කණ්ඩායමේ නායකත්වය සඳහා තුන් ඉරියව් ක්‍රීඩක දසුන් ශානකව පත්කර තිබේ.එක්දින කණ්ඩායමේ නායකයා ලෙස දිමුත් කරුණාරත්නව පත්කර ඇත.
මූලික සංචිතය සඳහා වේග පන්දුයවන ළහිරු කුමාර ඇතුළත්ව සිටියද කොවිඩ් වෛරසය ආසාදනයවීම මත තරගාවලියට සහභාගිවීමේ අවස්ථාව ඔහුට අහිමි වූ අතර ඒ වෙනුවට වේග පන්දුයවන සුරංග ලක්මාල්ව නම් කර ඇත.