මෙරට වගා කළ හැකි දේ වගා කර, පිට රට ගොවියාට යන මුදල් අපේ ගොවියාගේ අතට ඒමට සලස්වන බව ජනාධිපති ගෝඨාභය රාජපක්ෂ මහතා පැවසීය.
කෘෂිකර්මාන්තය නගා සිටුවීම සඳහා ගොවි ජනතාවට අවශ්‍ය ජලය, පොහොර, තාක්ෂණ දැනුම සැපයීමට මෙන්ම ඉඩම් ගැටළු විසඳීමට රජය ප්‍රමුඛතාව දී තිබේ. 2021 අයවැයෙන් ඒ සඳහා විශාල මුදලක් වෙන් කර ඇත. විදෙස් ණය සහ මෙරට ප්‍රතිපාදන යටතේ සැලසුම් කර ඇති ව්‍යාපෘති 800කට අධික සංඛ්‍යාවක වැඩ නිමවී නැත. මේ සියලු ව්‍යාපෘති කඩිනමින් නිම කොට ජනතා අපේක්ෂා ඉටු කිරීමට කැපවිය යුතු බව ජනාධිපතිවරයා පැවසු බව ජනාධිපති මාධ්‍ය අංශය පවසයි.
“ගම සමග පිළිසඳරක්” තුළින් “වැඩ සමග යළි ගමට” ජාතික වැඩසටහන පිළිබඳව රාජ්‍ය නිලධාරීන් දැනුවත් කිරීම සඳහා අරලියගහ මන්දිරයේ පැවති විශේෂ වැඩසටහනේ දී ජනාධිපතිවරයා මේ බව සඳහන් කළේය.
සියයට හැත්තෑපහක් පමණ වන ග්‍රාමීය ජනතාවගේ ජීවන තත්ත්වය නගා සිටුවීම පිණිස තිරසාර වැඩපිළිවෙළක අවශ්‍යතාව ජනාධිපතිවරයා පෙන්වා දුන්නේය.
ගොවි ජනතාව පාරම්පරිකව මුහුණ දී ඇති ගැටළු සහ දුෂ්කරතා නිසා වර්තමාන පරපුර කෘෂිකර්මාන්තයෙන් ඉවත්ව සිටිති.
අස්වැන්නට ඉහළ මිලක්, තාක්ෂණික දැනුම, ජල කළමනාකරණය, දේශීය බීජ නිෂ්පාදනය, වෙළෙඳ පොළ සහ ප්‍රවාහන පහසුකම් සැපයීම, කාබනික කෘෂි නිෂ්පාදනයට ගොවීන් දිරිමත් කිරීම වැනි ක්‍රමවලින් ප්‍රශ්නය විසදා ගැනීමට නිලධාරීන්ගේ විශේෂ අවධානය යොමු කළ යුතු බව ජනාධිපතිවරයා අවධාරණය කළේය.
ග්‍රාමීය ගැටළු නීති රීති මත නොව, ජනතාව දෙස බලා විසඳීමට පියවර ගැනීම වැදගත් වේ. එබැවින් කාර්යාලවලට සීමා නොවී ගමට ගොස්, ජනතාව පෙළෙන ප්‍රශ්න හඳුනාගෙන වැඩ කිරීම නිලධාරීන්ගේ යුතුකමක් සහ වගකීමක් බව ජනාධිපතිවරයා පෙන්වා දුන්නේය.
ව්‍යාපෘති සහ වැඩසටහන් ක්‍රියාවට නැංවීමේ දී පැන නගින ගැටළු සහ ඒවා නිරාකරණය කළ යුතු ආකාරය පිළිබඳව සාකච්ඡා කිරීම වැඩසටහනේ අරමුණක් විය.
වන අලි මෙන්ම වෙනත් සතුන්ගෙන් වගාවන්ට වන හානි අවම කර ගැනීමට රජය පියවර රැසක් ගෙන ඇතැයි ආර්ථික පුනර්ජීවනය හා දරිද්‍රතාව තුරන් කිරීමේ ජනාධිපති කාර්ය සාධක බලකායේ ප්‍රධානී බැසිල් රාජපක්ෂ මහතා මහජන නියෝජිතයන් ඉදිරිපත් කළ ගැටළුවලට පිළිතුරු දෙමින් පැවසීය.
එවැනි ගැටළු විසඳීමට ග්‍රාමීයව ඇති යෝජනා රජයට ඉදිරිපත් කරන්නැයි ද බැසිල් රාජපක්ෂ මහතා ඉල්ලා සිටියේය.
කැබිනට් සහ රාජ්‍ය අමාත්‍යවරු, ආණ්ඩුකාරවරු, අමාත්‍යාංශ , දිස්ත්‍රික් හා ප්‍රාදේශීය ලේකම්වරු, ක්‍රම සම්පාදන සේවයේ නිලධාරීහු, ගණකාධිකාරීවරු ඇතුළු රාජ්‍ය නිලධාරීහූ රැසක් මේ අවස්ථාවට එක්ව සිටියහ.